فوتو: ۇقشۇ
سوڭعى كۇندەرى ۇجىمدىق قاۋىپسىزدىك تۋرالى شارت ۇيىمى (ۇقشۇ) اياسىنداعى ساياسي جاعدايعا قاتىستى ءتۇرلى اقپارات تاراۋدا. «نەزىگار» Telegram-ارناسىنىڭ جازۋىنشا، قازاقستان مەن قىرعىزستان بەلارۋسكە اسكەري كونتينگەنت جىبەرۋ ماسەلەسىنە بايلانىستى ساقتىق تانىتىپ وتىر، دەپ حابارلايدى “ادىرنا”.
ارنا اۆتورلارىنىڭ ايتۋىنشا، قازاقستان باسشىلىعىنداعى ءبىر دەرەككوز پرەزيدەنت قاسىم-جومارت توقاەۆتىڭ 22–23 ماۋسىم كۇندەرى بريۋسسەلگە جاساعان رەسمي ساپارى بارىسىندا ۋكراينا مەن بەلارۋس اراسىنداعى جاعدايعا قاتىستى ماسەلەنى كوتەرگەنىن حابارلاعان. ول ەۋروپا وداعى باسشىلارىمەن كەزدەسۋدە تاراپتاردىڭ قاقتىعىسقا كورشى ەلدەردى تارتىپ جاتقانىنا الاڭداۋشىلىق بىلدىرگەن، الايدا ناقتى كىم تۋرالى ايتىلعانىن ناقتىلاماعان.
«قازاقستان مەن قىرعىزستان ۋكرايناداعى قاقتىعىسقا ارالاسۋعا الاڭداۋشىلىق ءبىلدىردى. ولاردىڭ وكىلدەرى ۇقشۇ اياسىندا اسكەري كومەك كورسەتۋ تۋرالى باپتى ىسكە قوسۋ جونىندەگى شەشىمدى پارلامەنتتەر قابىلداۋى ءتيىس ەكەنىن، بىراق بۇل دەپۋتاتتار اراسىندا كەلىسپەۋشىلىك تۋدىرۋى مۇمكىن ەكەنىن ايتتى»، – دەپ جازادى «نەزىگار» دەرەككوزگە سىلتەمە جاساپ.
ۇقشۇ اپپاراتى شەشىم قابىلداۋدا اسىقپاۋعا شاقىرىپ، لۋكاشەنكوعا قاقتىعىستى بولدىرماۋدىڭ جولدارىن قاراستىرۋدى ۇسىنعان.
كانال مالىمەتىنشە، قىرعىزستان ءسىم وكىلى بىلاي دەگەن: «ۋكراينانىڭ بەلارۋسكە اگرەسسيا فاكتىسى بۇۇ نەمەسە قاۋىپسىزدىك كەڭەسى قارارىمەن راستالۋى ءتيىس. ەگەر مۇنداي شەشىم بولماسا، ۇقشۇ بۇل جاعدايعا ارالاسا المايدى».
25 ماۋسىم كۇنى الەكساندر لۋكاشەنكو بەلارۋستى سوعىسقا تارتۋ جونىندەگى قىسىمنان اشىق تۇردە باس تارتتى. ول، سونىڭ ىشىندە رەسەيدىڭ بەلارۋستەگى ەلشىسى بوريس گرىزلوۆتىڭ ۇستانىمىنا دا جاۋاپ بەردى.
ء«بىزدى سوعىسقا يتەرمەلەۋدىڭ قاجەتى جوق. پرەزيدەنت پۋتينمەن بۇل ماسەلەنى مىڭ رەت تالقىلادىق. ۋكرايندارعا قارسى قالاي سوعىسامىز؟ ول جاقتا نەگىزىنەن موبيليزاتسيالانعان قاراپايىم ادامدار – مەحانيزاتورلار، ساۋىنشىلار، جۇمىسشىلار. ءبىز ولاردى اتقىلايمىز با؟ ءبىز دە ۋكرايندارمەن سوعىسقىمىز كەلمەيدى»، – دەدى ول.
ارنا دەرەگىنشە، ماسكەۋدە نارازىلىق كۇشەيىپ جاتىر.
«ەگەر سوعىس كەزىندە وداقتاس رەتىندە بەلارۋستىڭ پايداسى بولماسا، ونىڭ قاجەتى قانشا؟» دەگەن پىكىرلەر ايتىلۋدا.
«نەزىگار» سۇحبات العان اسكەري ساراپشىلاردىڭ پىكىرىنشە، قازاقستان مەن قىرعىزستان بەلارۋستى قورعاۋ ءۇشىن اسكەري كونتينگەنت جىبەرمەيدى. بۇل ماسەلەنىڭ ءوزى ۇيىمنىڭ ىدىراۋىنا اكەلۋى مۇمكىن. سونىمەن بىرگە بەلارۋس تاراپىنان اسكەري كومەك تۋرالى باستاما كوتەرىلمەيدى دەگەن بولجام بار.
جالپى العاندا، ۇقشۇ اسكەري وداق رەتىندە ءىس جۇزىندە السىرەگەن. ساراپشىلار قازاقستان مەن قىرعىزستاننىڭ بەيتاراپ ساياساتتى جالعاستىراتىنىن ايتادى. توقاەۆتىڭ بريۋسسەلگە ساپارى ولاردىڭ باتىسقا جاقىنداۋ باعىتىن كورسەتەدى. ۇيىمنىڭ رەسمي تۇردە تاراۋى كۇتىلمەيدى، الايدا رەسەي ءۇشىن بۇل تەك «سىرتقى كورىنىس»، ال قالعان ەلدەر ءۇشىن – ەكونوميكالىق تيىمدىلىك قۇرالى رەتىندە قالۋى مۇمكىن. ناتيجەسىندە رەسەيدىڭ ناقتى اسكەري وداعى جوق دەگەن تۇجىرىم جاسالادى.
