الماتى وبلىسىنىڭ كەگەن اۋدانىندا پوليتسەي اسلان السەروۆتىڭ ولىمىنە قاتىستى تەرگەۋ جالعاسىپ جاتىر. قىلمىسقا مارقۇمنىڭ جۇبايى مەن بالاسى كۇدىكتى رەتىندە قاراستىرىلۋدا، دەپ حابارلايدى "ادىرنا" ۇلتتىق پورتالى.
كتك حابارلاۋىنشا، وقيعا ورىن العان كوپقاباتتى ءۇيدىڭ تۇرعىندارىنىڭ ايتۋىنشا، قايعىلى جاعداي بولعان كۇنى پاتەردەن ەشقانداي ايقاي-شۋ نەمەسە كۇمان تۋدىراتىن دىبىس ەستىلمەگەن. كورشىلەر بۇل تۋرالى تەك قۇقىق قورعاۋ ورگاندارىنىڭ قىزمەتكەرلەرى كەلىپ، ءمان-جايدى انىقتاي باستاعاننان كەيىن عانا بىلگەندەرىن ايتادى.
ولاردىڭ سوزىنشە، وتباسى مۇشەلەرى تىنىش ءومىر سۇرگەن، ال مارقۇم مەن ونىڭ جۇبايىن كورشىلەر جاعىمدى ادامدار رەتىندە سيپاتتايدى. الدىن الا مالىمەتتەرگە سايكەس، كىسى ءولىمى وتباسى تۇرعان پاتەردە بولعان. تەرگەۋ نۇسقاسى بويىنشا، كەيىن ءمايىت باسقا جەرگە شىعارىلىپ، ورتەلگەن. بۇل اقپاراتتى قۇقىق قورعاۋ ورگاندارى جان-جاقتى تەكسەرىپ جاتىر.
مارقۇم اسلان السەروۆ 24 ماۋسىم كۇنى جەر قوينىنا تاپسىرىلدى. ونىڭ تۋىستارى وقيعانىڭ ناقتى سەبەپتەرىن بىلمەيتىندەرىن ايتىپ، ءىستىڭ ءادىل تەرگەلىپ، كىنالىلەر زاڭ اياسىندا جاۋاپقا تارتىلۋىن تالاپ ەتۋدە.
