25 ماۋسىم كۇنى «تازا قازاقستان» رەسپۋبليكالىق ەكولوگيالىق اكتسياسى اياسىندا قىزىلوردا قالاسىنداعى «سىر سۇلەيلەرى» اللەياسىندا «تازا قالا – ورتاق جاۋاپكەرشىلىك» اتتى تازالىق شاراسى ۇيىمداستىرىلدى.
اكتسيانىڭ نەگىزگى ماقساتى – قورشاعان ورتانىڭ تازالىعىن ساقتاۋ، ەكولوگيالىق مادەنيەتتى قالىپتاستىرۋ جانە تۇرعىنداردىڭ تابيعاتقا دەگەن جاۋاپكەرشىلىگىن ارتتىرۋ.
شاراعا «جاسىل ەل» ەڭبەك جاساقتارىنىڭ ساربازدارى جانە بەلسەندى جاستار قاتىسىپ، اللەيا اۋماعىن قوقىستان تازارتۋ، جاسىل جەلەكتەردىڭ ماڭىن رەتكە كەلتىرۋ، سونداي-اق اللەيا بويىندا ورنالاسقان ەسكەرتكىشتەر مەن مۇسىندەردى ءسۇرتىپ، كۇتىپ-باپتاۋ جۇمىستارىن جۇرگىزدى.
شارانىڭ ارنايى قوناعى ءارى سپيكەرى – ءۇش دۇركىن «التىن دومبىرا» يەگەرى، بەلگىلى ايتىسكەر اقىن مۇحتار نيازوۆ بولدى.
كەزدەسۋ بارىسىندا اقىن جاستارمەن ەركىن پىكىر الماسىپ، «سىر سۇلەيلەرى» اللەياسىنىڭ اشىلۋ تاريحى مەن ونىڭ رۋحاني-مادەني ماڭىزىنا توقتالدى.
سونداي-اق ول سىر وڭىرىنەن شىققان جىراۋلار مەن شايىرلاردىڭ قازاق ادەبيەتى مەن ونەرىندەگى ورنى تۋرالى ايتىپ، جاستاردى ۇلتتىق قۇندىلىقتاردى قۇرمەتتەۋگە جانە تاريحي-مادەني مۇرالاردى كوزدىڭ قاراشىعىنداي ساقتاۋعا شاقىردى.
اكتسيا اياسىندا قاتىسۋشىلار ەكولوگيالىق مادەنيەتتىڭ ماڭىزى تۋرالى پىكىر الماسىپ، قوعامدا تازالىق پەن ءتارتىپتى ساقتاۋدىڭ ورتاق مىندەت ەكەندىگىن كورسەتتى. جاستار قورشاعان ورتانى قورعاۋعا باعىتتالعان باستامالارعا بەلسەندى قاتىسىپ، تۋعان قالانىڭ كوركەيۋىنە ءوز ۇلەستەرىن قوستى.
مۇنداي شارالار تۇرعىنداردىڭ ەكولوگيالىق ساۋاتتىلىعىن ارتتىرىپ قانا قويماي، قوعامدا تابيعاتقا جاناشىرلىق پەن جاۋاپكەرشىلىك مادەنيەتىن قالىپتاستىرۋعا ىقپال ەتەدى.
«تازا قازاقستان» اكتسياسى اياسىنداعى يگى باستامالار الداعى ۋاقىتتا دا ءوز جالعاسىن تابادى.
