Фото: Manaure Quintero / AFP via Getty Images
Сәрсенбі күні кешке Венесуэла астанасы Каракастың батысында магнитудасы 7,2 және 7,5 болатын екі күшті жер сілкінісі болды. Салдарынан қалада бірнеше ғимарат қирап, мамандар адам шығыны көп болуы мүмкін екенін болжап отыр. Бұл туралы BBC жазды, деп хабарлайды "Адырна".
АҚШ-тың Геологиялық қызметінің (USGS) мәліметінше, екінші жер сілкінісі алғашқы дүмпуден бір минутқа жетер-жетпес уақыт өткенде болған.
«Адам шығынының көп болуы және ауқымды залал келуі ықтимал. Бұл апаттың салдары өте кең көлемде болуы мүмкін», – деп мәлімдеді Геологиялық қызмет өкілдері.
Алдын ала бағалауға сәйкес, қаза тапқандар саны 10 мыңнан 100 мың адамға дейін жетуі мүмкін. Әзірге Венесуэла билігі қаза тапқандар мен зардап шеккендер санына қатысты ресми мәлімет жариялаған жоқ.
Reuters агенттігінің хабарлауынша, елдің ішкі істер министрі Диосдадо Кабельо мемлекеттік телеарна эфирінде Каракаста бірнеше ғимараттың қирап қалғанын мәлімдеді.
Венесуэла президентінің міндетін атқарушы Делси Родригес елде төтенше жағдай режимі енгізілгенін хабарлады. Сондай-ақ ол жер сілкінісінен келген зақымға байланысты Каракас халықаралық әуежайының жұмысы уақытша тоқтатылғанын айтты.
Жер сілкінісі болған сәтте көптеген венесуэлалық үйлерінде болған. Себебі бұл күні елде Симон Боливар әскері испан әскерлерін жеңіп, Венесуэланың тәуелсіздігіне жол ашқан 1821 жылғы Карабобо шайқасы күні атап өтілген.
Каракастың Чакао муниципалитетінің басшысы Густаво Дуке Саэстің айтуынша, аудан аумағында кемінде екі ғимарат толық қираған, тағы бірнеше нысан қатты зақымданған.
Оның сөзінше, үйінді астынан 18 адам құтқарылып шыққан. Қазіргі уақытта оқиға орнында 500-ден астам құтқарушы жұмыс істеп, тұрғындарды эвакуациялау және іздестіру-құтқару жұмысын жүргізіп жатыр.
