سولتۇستىكتەگى بىرلىك اۋىلىندا 22 جاستاعى تۇرعىننىڭ 67 جاستاعى اكەسىنە كۇش قولدانعانى تۋرالى دەرەك تىركەلدى، دەپ حابارلايدى "ادىرنا" ءتىلشىسى.
جەتى ارنانىڭ اقپاراتىنا سايكەس، وقيعا كەزىندە ماس كۇيدە بولعان جىگىت ءوز ارەكەتىن ۇيالى تەلەفونعا ءتۇسىرىپ، كەيىن بەينەجازبا الەۋمەتتىك جەلىلەردە تاراعان. پوليتسيا قىزمەتكەرلەرى وقيعاعا قاتىسى بار ازاماتتاردى انىقتاپ، تەكسەرۋ جۇمىستارىن جۇرگىزدى.
پوليتسيا دەپارتامەنتىنىڭ مالىمەتىنشە، ەگدە جاستاعى ەر ادام ۇلىنا قاتىستى ەشقانداي شاعىمى جوق ەكەنىن مالىمدەگەن. سونداي-اق ونىڭ دەنەسىنەن كوزگە كورىنەتىن جاراقات بەلگىلەرى انىقتالماعان جانە سوت-مەديتسينالىق ساراپتامادان وتۋدەن باس تارتقان.
وسىعان بايلانىستى قۇقىق قورعاۋ ورگاندارى كۇدىكتىنى تۇرمىستىق زورلىق-زومبىلىق فاكتىسى بويىنشا جاۋاپقا تارتا المادى. دەگەنمەن، ونىڭ ارەكەتتەرىنەن قوعامدىق ءتارتىپتى بۇزۋ بەلگىلەرى انىقتالىپ، بالاعات سوزدەر ايتىپ، بۇزاقىلىق جاساعانى ءۇشىن اكىمشىلىك جاۋاپكەرشىلىككە تارتىلدى.
سوت شەشىمىمەن قۇقىق بۇزۋشى بەس تاۋلىككە اكىمشىلىك قاماۋعا الىندى. بۇدان بولەك، ول ىشكى ىستەر ورگاندارىنىڭ پروفيلاكتيكالىق ەسەبىنە قويىلىپ، قورعاۋ نۇسقاماسى شىعارىلدى. قۇقىق قورعاۋ ورگاندارىنىڭ مالىمەتىنشە، نۇسقاما تالاپتارىن بۇزعان جاعدايدا ازاماتقا قاتىستى قوسىمشا شارالار قولدانىلىپ، قايتا قاماۋعا الۋ مۇمكىندىگى قاراستىرىلادى.
