الماتىدا سوڭعى اپتا ىشىندە بەزگەك اۋرۋىنىڭ ەكى جاعدايى تىركەلدى. بۇل تۋرالى ۇلتتىق قوعامدىق دەنساۋلىق ساقتاۋ ورتالىعى مالىمدەدى، دەپ حابارلايدى "ادىرنا" ۇلتتىق پورتالى.
ۆەدومستۆونىڭ مالىمەتىنشە، ينفەكتسيا گابوننان ءىسساپاردان جانە ۆەتنامنان تۋريستىك ساپاردان ورالعان ازاماتتاردان انىقتالعان. وسىلايشا، جىل باسىنان بەرى الماتىدا شەتەلدەن اكەلىنگەن بەزگەك اۋرۋىنىڭ جالپى ءتورت جاعدايى تىركەلىپ وتىر.
مامانداردىڭ ايتۋىنشا، ناۋقاستاردىڭ بىرىنەن تروپيكالىق بەزگەك، ەكىنشىسىنەن ءۇش كۇندىك بەزگەك انىقتالعان. تروپيكالىق بەزگەك – اۋرۋدىڭ ەڭ قاۋىپتى ءتۇرى سانالادى. ۋاقىتىلى ەم كورسەتىلمەگەن جاعدايدا ول مي، باۋىر، بۇيرەك جانە تىنىس الۋ جۇيەسىنە زاقىم كەلتىرىپ، اۋىر اسقىنۋلارعا نەمەسە ولىمگە اكەلۋى مۇمكىن. ال ءۇش كۇندىك بەزگەك سالىستىرمالى تۇردە جەڭىل وتكەنىمەن، ونىڭ قوزدىرعىشى اعزادا ۇزاق ۋاقىت ساقتالىپ، بىرنەشە ايدان كەيىن قايتا بەلسەندى بولۋى ىقتيمال.
ورتالىقتىڭ حابارلاۋىنشا، ەكى جاعداي دا زەرتحانالىق ساراپتامامەن راستالعان. قازىرگى ۋاقىتتا ناۋقاستار ستاتسيوناردا ەم قابىلداپ جاتىر. سونىمەن قاتار ىندەتتىڭ تارالۋىنا جول بەرمەۋ ماقساتىندا قاجەتتى ەپيدەمياعا قارسى ءىس-شارالار جۇرگىزىلۋدە.
ماماندار بەزگەك Anopheles تۇقىمداسىنا جاتاتىن ماسالاردىڭ شاعۋى ارقىلى جۇعاتىنىن اتاپ ءوتتى. اۋرۋ تۇرمىستىق قارىم-قاتىناس كەزىندە، قول الىسۋ، ورتاق ىدىس-اياق پايدالانۋ، تاعام، سۋ نەمەسە اۋا-تامشى جولىمەن بەرىلمەيدى.
دەنساۋلىق ساقتاۋ سالاسىنىڭ ماماندارى بەزگەك كەڭ تارالعان ەلدەرگە ساپارلايتىن ازاماتتارعا الدىن الۋ شارالارىن ساقتاۋعا كەڭەس بەرەدى.
