Almatyda soŋǧy apta ışınde bezgek auruynyŋ ekı jaǧdaiy tırkeldı. Būl turaly Ūlttyq qoǧamdyq densaulyq saqtau ortalyǧy mälımdedı, dep habarlaidy "Adyrna" ūlttyq portaly.
Vedomstvonyŋ mälımetınşe, infeksiia Gabonnan ıssapardan jäne Vetnamnan turistık sapardan oralǧan azamattardan anyqtalǧan. Osylaişa, jyl basynan berı Almatyda şetelden äkelıngen bezgek auruynyŋ jalpy tört jaǧdaiy tırkelıp otyr.
Mamandardyŋ aituynşa, nauqastardyŋ bırınen tropikalyq bezgek, ekınşısınen üş kündık bezgek anyqtalǧan. Tropikalyq bezgek – aurudyŋ eŋ qauıptı türı sanalady. Uaqytyly em körsetılmegen jaǧdaida ol mi, bauyr, büirek jäne tynys alu jüiesıne zaqym keltırıp, auyr asqynularǧa nemese ölımge äkeluı mümkın. Al üş kündık bezgek salystyrmaly türde jeŋıl ötkenımen, onyŋ qozdyrǧyşy aǧzada ūzaq uaqyt saqtalyp, bırneşe aidan keiın qaita belsendı boluy yqtimal.
Ortalyqtyŋ habarlauynşa, ekı jaǧdai da zerthanalyq saraptamamen rastalǧan. Qazırgı uaqytta nauqastar stasionarda em qabyldap jatyr. Sonymen qatar ındettıŋ taraluyna jol bermeu maqsatynda qajettı epidemiiaǧa qarsy ıs-şaralar jürgızılude.
Mamandar bezgek Anopheles tūqymdasyna jatatyn masalardyŋ şaǧuy arqyly jūǧatynyn atap öttı. Auru tūrmystyq qarym-qatynas kezınde, qol alysu, ortaq ydys-aiaq paidalanu, taǧam, su nemese aua-tamşy jolymen berılmeidı.
Densaulyq saqtau salasynyŋ mamandary bezgek keŋ taralǧan elderge saparlaityn azamattarǧa aldyn alu şaralaryn saqtauǧa keŋes beredı.
