قازاقستاندا ماۋسىمنىڭ ءۇشىنشى جەكسەنبىسى – اكەلەر كۇنى. وسىعان وراي «وتباسى – باقىت مەكەنى» جوباسى اياسىندا فۋتبولدان شەبەرلىك ساباق ۇيىمداستىرىلدى. سپورتتىق شاراعا اكەلەر مەن بالالار قاتىسىپ، كاسىبي باپكەرلەردىڭ جەتەكشىلىگىمەن ارنايى جاتتىعۋلار جاسادى. سونداي-اق باسقوسۋ سوڭىندا وتباسىلىق كوماندالار جولداستىق ماتچ وتكىزدى.
شارانىڭ قۇرمەتتى قوناعى رەتىندە «اكەلەر وداعى» رەسپۋبليكالىق قوعامدىق بىرلەستىگى توراعاسىنىڭ ورىنباسارى، استانا قالالىق فيليالىنىڭ باسشىسى بەكدايىر كۇزەمباي، «اكەلەر وداعى» بىرلەستىگىنىڭ استانا قالالىق فيليالى توراعاسىنىڭ ورىنباسارى تەمىرحان تۇرلىباەۆ جانە تانىمال فۋتبولشى، فۋتبولدان ۇلتتىق قۇراما باس باپكەرىنىڭ اسسيستەنتى ەلدوس احمەتوۆ قاتىستى.
– ءۇش جىل بۇرىن ۇكىمەت قاۋلىسى شىعىپ، وتباسىعا قاتىستى ەكى مەرەكە رەسمي اتاپ وتىلەتىن بولدى. ءبىرىنشىسى انالار كۇنى، ەكىنشىسى اكەلەر كۇنى. مۇنداي قادام وتباسى ينستيتۋتىن نىعايتۋعا جانە اتا-بابادان جەتكەن سالت-ءداستۇرىمىزدى ناسيحاتتاۋعا زور ۇلەس قوسىپ كەلەدى. مەرەكە قارساڭىنداعى ەل اۋماعىندا اتا-انا جاۋاپكەرشىلىگىن ارتتىرۋعا ارنالعان كەلەلى جيىندار تولاستاعان ەمەس. بۇگىنگى سپورتتىق شارادا دا اكە مەن بالانىڭ ىنتىماعىنىڭ، وتباسى بىرلىگىنىڭ كۋاسى بولدىق، – دەيدى بەكدايىر كۇزەمباي.
ال تانىمال سپورتشى ەلدوس احمەتوۆ اكەلەردىڭ بالالارىمەن بىرگە جاتتىعىپ، بىرگە الاڭعا شىعۋىن جاقسى باستاماعا بالادى.
– اكەلەر مەن بالالاردى سپورت ارقىلى بىرىكتىرەتىن وسىنداي شارالاردىڭ ماڭىزى وتە زور. فۋتبول – تەك ويىن ەمەس، ول تارتىپكە، جاۋاپكەرشىلىككە جانە ءبىر-ءبىرىن قولداۋعا ۇيرەتەدى. بۇگىن الاڭدا اكەلەر مەن بالالاردىڭ بىرگە جاتتىعىپ، بىرگە ويناعانىن كورۋ ەرەكشە اسەر قالدىردى. وسىنداي كەزدەسۋلەر وتباسىلىق بايلانىستى نىعايتىپ، بالالارعا جاقسى ۇلگى بەرەدى، – دەدى ەلدوس احمەتوۆ.
ايتا كەتەيىك، «وتباسى – باقىت مەكەنى» جوباسى استانالىق جاس وتباسىلاردى قولداۋ باعىتىندا جۇيەلى جۇمىس جۇرگىزىپ كەلەدى. جاستاردىڭ الەۋمەتتىك ماسەلەلەرىن شەشۋگە، ولاردىڭ جان-جاقتى دامۋىنا جانە بوس ۋاقىتىن ءتيىمدى وتكىزۋىنە ىقپال ەتۋدە.
