بەلارۋس پرەزيدەنتى الەكساندر لۋكاشەنكو ۋكراينا بويىنشا بەيبىت كەلىسىمگە قول جەتكىزۋ ءۇشىن تاراپتار ىمىراعا كەلۋى قاجەت ەكەنىن مالىمدەدى. بۇل تۋرالى ول 15 ماۋسىمدا «ال-ارابيا» تەلەارناسىنا بەرگەن سۇحباتىندا ايتتى، دەپ حابارلايدى «ادىرنا ءتىلشىسى».
«پۋتين مەن زەلەنسكي عانا ەمەس، سونىمەن بىرگە ەۋروپالىق كوشباسشىلار دا بارلىعىنىڭ تىعىرىققا تىرەلگەنىن، ءارى قاراي تەك ەسكالاتسيا مەن ودان دا اۋىر جاعداي بولاتىنىن تۇسىنسە، وندا ىمىراعا كەلۋ مۇمكىندىگى بار. ەگەر سوعىسىپ جاتقان تاراپتار مەن ولاردىڭ قولداۋشىلارىنىڭ ساناسىندا وسى تۇسىنىك قالىپتاسسا، كەلىسىمگە قول جەتكىزۋگە بولادى»، – دەدى ول.
ول ناقتى قانداي قادامدار جاساۋ كەرەكتىگىن ايتپادى.
«بۇل كەلىسسوز ۇستەلىندە شەشىلەدى. مەن ەمەس، قاقتىعىسقا تىكەلەي قاتىسۋشى تاراپتار شەشەدى»، – دەدى لۋكاشەنكو.
سونداي-اق پرەزيدەنت دەلدالدىققا وڭ كوزقاراستا ەمەس ەكەنىن دە جەتكىزدى.
«مەن دەلدالدىقتى ۇناتپايمىن. نەگە؟ بۇرىن باتىس پەن بەلارۋس اراسىنداعى جاعداي شيەلەنىسكەن كەزدە دەلدال بولعىسى كەلگەندەر كوپ بولدى. مەن ولارعا: «راحمەت، قاجەت ەمەس»،– دەدىم. ءبىز ءوزىمىز-اق كەلىسۋگە تىرىسامىز. دەلدال بولۋ – وتە قاۋىپتى جاعداي، ارادا قالىپ قويۋىڭ مۇمكىن»، – دەدى ول.
ونىڭ سوزىنشە، بەلارۋس، ەڭ الدىمەن بەيبىتشىلىكتى قالايدى.
«سوعىس ءبىزدىڭ اۋلامىزدا ءوتىپ جاتىر. ءبىز دە ۋكراينا مەن رەسەي سياقتى زارداپ شەگۋىمىز مۇمكىن. سوندىقتان بۇل قاقتىعىس توقتاۋى كەرەك دەپ باسىنان ايتتىم»، – دەدى ول.
ودان بولەك، لۋكاشەنكو ءۇش سلاۆيان حالقى – بەلارۋس، رەسەي جانە ۋكراينا – ءوزارا كەلىسىپ، سوعىستىڭ سالدارىن بىرگە ەڭسەرۋى كەرەك ەكەنىن اتاپ ءوتتى.
«زەلەنسكي – اقىلدى ادام، ول اقىرى تۇسىنەدى دەپ ويلايمىن. رەنىش پەن امبيتسيادان ءوتىپ، مىڭداعان ادامنىڭ ءومىرىن ويلاۋ كەرەك»، – دەپ تۇيىندەدى بەلارۋس پرەزيدەنتى.
