Belarus prezidentı Aleksandr Lukaşenko Ukraina boiynşa beibıt kelısımge qol jetkızu üşın taraptar ymyraǧa keluı qajet ekenın mälımdedı. Būl turaly ol 15 mausymda «Al-Arabiia» telearnasyna bergen sūhbatynda aitty, dep habarlaidy «Adyrna tılşısı».
«Putin men Zelenskii ǧana emes, sonymen bırge europalyq köşbasşylar da barlyǧynyŋ tyǧyryqqa tırelgenın, ärı qarai tek eskalasiia men odan da auyr jaǧdai bolatynyn tüsınse, onda ymyraǧa kelu mümkındıgı bar. Eger soǧysyp jatqan taraptar men olardyŋ qoldauşylarynyŋ sanasynda osy tüsınık qalyptassa, kelısımge qol jetkızuge bolady», – dedı ol.
Ol naqty qandai qadamdar jasau kerektıgın aitpady.
«Būl kelıssöz üstelınde şeşıledı. Men emes, qaqtyǧysqa tıkelei qatysuşy taraptar şeşedı», – dedı Lukaşenko.
Sondai-aq prezident deldaldyqqa oŋ közqarasta emes ekenın de jetkızdı.
«Men deldaldyqty ūnatpaimyn. Nege? Būryn Batys pen Belarus arasyndaǧy jaǧdai şielenısken kezde deldal bolǧysy kelgender köp boldy. Men olarǧa: «Rahmet, qajet emes»,– dedım. Bız özımız-aq kelısuge tyrysamyz. Deldal bolu – öte qauıptı jaǧdai, arada qalyp qoiuyŋ mümkın», – dedı ol.
Onyŋ sözınşe, Belarus, eŋ aldymen beibıtşılıktı qalaidy.
«Soǧys bızdıŋ aulamyzda ötıp jatyr. Bız de Ukraina men Resei siiaqty zardap şeguımız mümkın. Sondyqtan būl qaqtyǧys toqtauy kerek dep basynan aittym», – dedı ol.
Odan bölek, Lukaşenko üş slavian halqy – Belarus, Resei jäne Ukraina – özara kelısıp, soǧystyŋ saldaryn bırge eŋseruı kerek ekenın atap öttı.
«Zelenskii – aqyldy adam, ol aqyry tüsınedı dep oilaimyn. Renış pen ambisiiadan ötıp, myŋdaǧan adamnyŋ ömırın oilau kerek», – dep tüiındedı Belarus prezidentı.
