الماتى قالاسىنىڭ المالى اۋداندىق سوتىندا ا. كاسەنوۆ، ا. ماتاەۆ جانە باسقا دا تۇلعالارعا قاتىستى قىلمىستىق ءىستى قاراۋ جالعاسۋدا، دەپ حابارلايدى "ادىرنا".
سوت وتىرىسى بارىسىندا مەملەكەتتىك ايىپتاۋشى ا. كاسەنوۆقا قاتىستى ۇيقاماق تۇرىندەگى بۇلتارتپاۋ شاراسىن كۇزەتپەن ۇستاۋعا وزگەرتۋ تۋرالى ءوتىنىشحات بەردى.
انىقتالعانداي، سوتتىڭ 2025 جىلعى 24 جەلتوقسانداعى قاۋلىسىمەن كاسەنوۆقا الەۋمەتتىك جەلىلەر مەن ينتەرنەت جەلىسىن پايدالانۋعا، كەز كەلگەن حات-حاباردى الۋعا جانە جىبەرۋگە، سونداي-اق ينتەرنەت، ۇيالى بايلانىس جانە قالالىق تەلەفوندى قوسا العاندا، كەز كەلگەن بايلانىس قۇرالدارىن پايدالانىپ سويلەسۋگە جانە حات الماسۋعا تىيىم سالىنعان ۇيقاماق تۇرىندەگى بۇلتارتپاۋ شاراسى سانكتسيالانعانىن كورسەتتى.
سونىمەن قاتار، سوتتىڭ 2026 جىلعى 5 ماۋسىمداعى قاۋلىسىمەن قىلمىستىق ءىس وندىرىسكە قابىلدانىپ، باستى سوت تالقىلاۋى تاعايىندالعان كەزدە بۇرىن تاڭدالعان بۇلتارتپاۋ شاراسى وزگەرىسسىز قالدىرىلعان.
سوعان قاراماستان، كاسەنوۆ 2026 جىلعى 2 ماۋسىمدا بۇقارالىق اقپارات قۇرالىنىڭ پاراقشاسىندا قارالىپ جاتقان قىلمىستىق ىسكە قاتىستى جەكە بەينەۇندەۋ جاريالاپ، ۇيقاماق تالاپتارىن بۇزعان. سونداي-اق 2026 جىلعى 15 ماۋسىمدا ينتەرنەت-رەسۋرستاردا قىلمىستىق ءىس بويىنشا مەدياتسيا ماسەلەسىنە قاتىستى تاعى ءبىر جەكە بەينەۇندەۋ جاريالاعان.
بۇدان بولەك، ول 2026 جىلعى 11 ماۋسىم ساعات 10:00-دە وتەتىن باستى سوت تالقىلاۋى تۋرالى ءتيىستى تۇردە حابارلانعانىنا قاراماستان، سوت وتىرىسىنا كەلمەگەن. وسىلايشا، ول سوتتىڭ العاشقى شاقىرۋى بويىنشا كەلۋ مىندەتىن بۇزعان.
تاراپتاردىڭ پىكىرلەرىن تىڭداپ، ۇسىنىلعان ماتەريالداردى زەرتتەگەن سوت مەملەكەتتىك ايىپتاۋشىنىڭ ءوتىنىشحاتىن قاناعاتتاندىرۋعا نەگىزدەر بار دەگەن قورىتىندىعا كەلدى.
سوت قاۋلىسىمەن ا.كاسەنوۆقا قاتىستى بۇلتارتپاۋ شاراسى ۇيقاماقتان كۇزەتپەن ۇستاۋعا وزگەرتىلدى.
كەلەسى سوت وتىرىسى 22 ماۋسىم ساعات 10:00گە تاعايىندالدى.
