فوتو: ومىربەك امرەەۆ
13 ماۋسىم كۇنى الماتىداعى Almaty Theatre ساحناسىندا تاۋەلسىز تەاتر كەڭىستىگىندەگى جاڭا تۋىندى – ء«سىزدى سۇيەم...» مۋزىكالىق دراماسىنىڭ تۇساۋكەسەرى ءوتتى. قويىلىم كورەرمەنگە ماحابباتتىڭ كۇردەلى تابيعاتىن، ادام جانىنىڭ ىشكى ارپالىسىن جانە تاعدىرلى تاڭداۋلاردىڭ سالدارىن اسەرلى تۇردە جەتكىزدى.
سپەكتاكل وقيعاسى پەريزات، باقىتجان، سارا، اسەت جانە قايراتتىڭ تاعدىرلارى ارقىلى ءوربىدى. كەيىپكەرلەر اراسىنداعى كۇردەلى قارىم-قاتىناستار شىنايى سەزىم مەن جاساندى بايلانىس، تاۋەلدىلىك پەن ەركىندىك، جالعىزدىق پەن ءۇمىت سەكىلدى ومىرلىك قايشىلىقتاردى اشىپ كورسەتتى. ءار كەيىپكەر ءوز شەشىمىنىڭ الدىندا تۇرىپ، ونىڭ اۋىر دا ماڭىزدى سالدارىن باستان وتكەرەدى.
قويىلىمنىڭ باستى ەرەكشەلىكتەرىنىڭ ءبىرى – ماحاببات تاقىرىبىن عانا ەمەس، الماتىنىڭ رۋحاني الەمىن دە تەرەڭ بەينەلەۋى بولدى. مۋزىكالىق درامادا قالا جاي عانا وقيعا وتەتىن ورىن رەتىندە ەمەس، وزىندىك مىنەزى مەن بولمىسى بار كوركەم وبراز رەتىندە كورىنىس تاپتى. الماتىنىڭ مادەني جادى، شىعارماشىلىق رۋحى مەن تاريحي كەلبەتى سپەكتاكلدىڭ يدەيالىق وزەگىنە اينالدى.
پەسا اۆتورى قولعانات مۇراتتىڭ ايتۋىنشا، تۋىندىنىڭ نەگىزگى ماقساتى – ادام جانىنىڭ تەرەڭ يىرىمدەرىن، ماحاببات پەن جاۋاپكەرشىلىكتىڭ اراقاتىناسىن ساحنا ءتىلى ارقىلى كورسەتۋ بولعان.
– بۇل شىعارمادا ءبىز تەك ەكى ادامنىڭ اراسىنداعى سەزىمدى ەمەس، ادامنىڭ ءوز-وزىمەن كۇرەسىن، جۇرەك پەن سانانىڭ تارتىسىن كورسەتۋگە تىرىستىق. سونىمەن قاتار الماتىنىڭ ەرەكشە رۋحىن، ونىڭ مادەني بولمىسى مەن ادامدار تاعدىرىنداعى ورنىن كوركەم تۇردە بەينەلەۋدى ماقسات ەتتىك، – دەدى اۆتور.
سپەكتاكلدىڭ كوركەمدىك شەشىمىندە قالا سيمۆولدارى ەرەكشە ورىن الداى. المانىڭ بەينەسى، گۇلدەگەن الما باقتارىنىڭ حوش ءيىسى مەن الماتىعا ءتان ەرەكشە اتموسفەرا ساحنالىق ءتىل ارقىلى اسەرلى جەتكىزىلەدى. وقيعالار شاھاردىڭ تاريحي جانە مادەني ماڭىزى زور ورىندارىندا ءوربىپ، وتكەن مەن بۇگىننىڭ اراسىنداعى بايلانىستى تەرەڭ سەزىندىرە الادى.
اۋەزدى اندەرمەن ارلەنگەن قويىلىم ادام جۇرەگىندەگى الاپات سەزىمدەردى، جاۋاپكەرشىلىك پەن تاڭداۋ ماسەلەسىن، ارمان مەن شىندىق اراسىنداعى تارتىستى شەبەر سۋرەتتەيدى. مۋزىكالىق دراما كورەرمەندى كەيىپكەرلەردىڭ جان دۇنيەسىنە جەتەلەپ، ءومىردىڭ ەڭ نازىك پسيحولوگيالىق قىرلارىن اشۋعا ۇمتىلعان.
شىعارماشىلىق توپ قۇرامىندا قازاقستاندىق تەاتر ونەرىنىڭ بەلگىلى وكىلدەرى ەڭبەك ەتتى. پەسا اۆتورى قولعانات مۇرات بولسا، مۋزىكالىق سۇيەمەلدەۋدى كومپوزيتور اسەل وماروۆا جازدى. قويىلىمدى قازاقستاننىڭ ەڭبەك سىڭىرگەن قايراتكەرى الما كاكىشەۆا ساحنالادى. جوبانىڭ پروديۋسەرى ءارى باستى رولدەردىڭ ءبىرىن سومداعان اكتريسا ينديرا قۇلماعامبەتوۆا بولدى.
ينديرا قۇلماعامبەتوۆانىڭ ايتۋىنشا، بۇل جوبا شىعارماشىلىق ۇجىم ءۇشىن ەرەكشە ماڭىزعا يە بولعان.
ء"ار ونەر ادامى ءوز ەڭبەگىن ومىرىندە ءىز قالدىرعان، رۋحاني تۇرعىدان جاقىن تۇلعاعا ارناعىسى كەلەدى. سوندىقتان بۇل قويىلىمدى قازاق تەاتر ونەرىنىڭ كورنەكتى وكىلى، ۇستازىمىز ەسمۇحان وباەۆتىڭ رۋحىنا ارناۋدى ءجون كوردىك. بۇل – ءبىزدىڭ قۇرمەتىمىز بەن العىسىمىزدىڭ بەلگىسى", – دەدى اكتريسا.
قويىلىمدا سونداي-اق قاسىم دەمەۋ، قۋانىش قونىسبەكوۆ، ايگەرىم قايراتقىزى جانە ەلشات مامەتەكوۆ ونەر كورسەتتى.
مۋزىكا، دراما جانە الماتىنىڭ ەرەكشە رۋحى توعىسقان ء«سىزدى سۇيەم...» مۋزىكالىق دراماسى كورەرمەنگە تەرەڭ اسەر قالدىرىپ، ادام جانىنىڭ كۇردەلى الەمى مەن ماحابباتتىڭ سان قىرلى تابيعاتىن جاڭا قىرىنان تانىتقان ساحنالىق تۋىندى رەتىندە باعالانۋدا.
