يلون ماسك تاعى ءبىر تاريحتى جازدى. 1950 جىلدارى سەرگەي كورولەۆ ويلاپ تاپقان “سويۋز» راكەتالارىن تاريحتىڭ ەنشىسىنە جىبەرەتىن “Starship SN15” زىمىرانى تەحاستان 10 مىڭ مەتر بيىكتىككە كوتەرىلىپ، امان-ەسەن دىتتەگەن نۇكتەگە قايتا قوندى.
الەمدە “Starship” زىمىرانى 150 تونناعا دەيىنگى جۇكتى، 100-دەن استام ادامدى وربيتاعا الىپ شىعا الار زاماناۋي قۋاتتى راكەتا سانالادى. وسى راكەتا بولاشاقتا ادامزات بالاسىن مارسقا جەتكىزەدى دەپ كۇتىلۋدە. NASA بۇعان دەيىن جەڭىل جۇكتەردى وربيتاعا الىپ شىعۋ ءۇشىن “SpaceX” كومپانياسى جاساپ شىققان “Falcon 9” زىمىراندارىن قولدانىپ كەلگەن ەدى. وسىنداي ۇزاق ۋاقىت قولدانا بەرۋگە بولاتىن زاماناۋي زىمىراننىڭ پايدا بولۋى “روسكوسموستى” تىعىرىققا تىرەگەنى دە بەلگىلى.
ەندى “Starship” زىمىرانى تەستتەن ءساتتى ءوتتى. بۇل اۋىر سالماقتاعى جۇكتەردى تاسۋعا ارنالعان، كوپ رەت قولدانۋعا بولاتىن، وربيتاعا شىعىپ، جەرگە قايتا قوناتىن زاماناۋي زىمىران. عىلىمداعى تاريحي كۇن. ءىرى جەتىستىك.
قازاقتىڭ كوپ پروبلەماسىن قازاقتىڭ ءوزى ەمەس، الەمدىك گەنيلەر، عىلىمنىڭ دامۋى شەشەتىنىنە تاعى ءبىر دالەل. روسكوسموسقا تاپسىرىستىڭ ازايۋى ۋاقىتتىڭ ماسەلەسى. بۇل جاڭالىق ءبىزدىڭ وتاندىق عىلىمدى قامشىلاۋى ءتيىس. وركەنيەت، عىلىم مەن ءبىلىم، ادامزاتتىڭ دامۋى ءبىزدىڭ كوز الدىمىزدا باسقا دەڭگەيگە شىعىپ جاتىر.
باۋىرجان سەرىكباەۆ،
"ادىرنا"ۇلتتىق پورتالى
