«قازاتوموندىرىس» ۇلتتىق كومپانياسىنىڭ بۇرىنعى باسشىسى، كاسىپكەر مۇحتار جاكىشەۆ قىزى التىناي جاكىشەۆانىڭ شەتەلدىك ازاماتقا تۇرمىسقا شىققانىن مالىمدەدى. بۇل تۋرالى ول الەۋمەتتىك جەلىدەگى پاراقشاسىندا جازدى، دەپ حابارلايدى «ادىرنا» ءتىلشىسى.
ساياساتكەر كۇيەۋ بالاسى كارلمەن التىنايدىڭ التى جىلدان بەرى تانىس ەكەنىن، ال ەكى جىل بۇرىن ونىڭ الماتىعا ارنايى كەلىپ، قىزىنىڭ قولىن سۇراعانىن ايتتى.
«5 ماۋسىم كۇنى قىزىمنىڭ ۇزاتۋ تويى ءوتتى. مەن التىناي ءۇشىن شەكسىز باقىتتىمىن. بۇل تاڭداۋ كەزدەيسوق نەمەسە اسىعىس جاسالعان جوق. ونىڭ نەگىزىندە شىنايى، پاك ماحاببات جاتىر. كارل ەكەۋى التى جىلدان بەرى تانىس. وسىدان ەكى جىل بۇرىن كارل الماتىعا ارنايى كەلىپ، الدىمنان ءوتتى. مەن ءوز باتامدى بەردىم. كارل ماعان ۇنايدى. ونىڭ ازاماتتىق ۇستانىمى دۇرىس، الدىنا قويعان ماقساتتارى ايقىن ءارى اۋقىمدى. ونىڭ ەڭبەكقورلىعىنا، بىلىمىنە جانە العان بەتىنەن قايتپايتىن قايسارلىعىنا قاراپ، كوزدەگەن شىڭدارىن باعىندىراتىنىنا كامىل سەنەمىن. بىراق مەن ءۇشىن ەڭ ماڭىزدىسى – قىزىمدى شىن جۇرەكتەن، تەرەڭ ءارى نازىك سەزىممەن سۇيەتىنى»،– دەدى جاكىشەۆ.
بيزنەسمەن بۇل تويدىڭ ءوزى ءۇشىن ەرەكشە مانگە يە بولعانىن ايتتى. ونىڭ سوزىنشە، ۇلكەن قىزى تۇرمىسقا شىققاندا ءوزى تۇرمەدە بولعاندىقتان، تويعا قاتىسا الماعان.
«بۇل تويدىڭ ءمانى مەن ءۇشىن تىم بولەك. ۇلكەن قىزىم تۇرمىسقا شىققاندا مەن تۇرمەدە وتىردىم. ول كەزدە اكە رەتىندە قولىمنان بار كەلگەنى ايگەرىمىمە ارناعان اق تىلەگىمدى قاعازعا ءتۇسىرىپ، حاتپەن بەرىپ جىبەرۋ عانا بولدى. سول حات تويىندا وقىلدى. ال بۇگىن ءبارى باسقاشا. قىزىڭنىڭ قۋانىشىندا قاعازداعى قۇرعاق سوزبەن شەكتەلمەي، ءسوزى قاعازدان عانا وقىلاتىن ادام بولماۋدىڭ ءوزى ءبىر عانيبەت. قىزىڭدى ءوزىڭ ۇزاتىپ، وسىناۋ ومىرلىك ماڭىزى بار اق بوساعادان اتتار ساتىندە التىنايىڭا جۇرەكجاردى جىلى سوزدەرىڭدى ءوزىڭ ايتا الۋىڭ نەتكەن باقىت! مەنى تۇتقىنداعاندا التىناي نە بارى 9 جاستا عانا ەدى. بوستاندىققا شىققانىمدا ول جيىرماعا تولىپتى. ول مەنسىز ەسەيدى. ول بالا كۇنىندە-اق، مەنى جانۇيامىز ارقىلى كورسەتىلەتىن قىسىمنان قۇتقارۋ ءۇشىن، تۋعان ءۇيىن تاستاپ جات جەرگە كەتۋگە ءماجبۇر بولدى، بوتەن ەلدە ءوستى. اتا-اناسىنىڭ ايالى الاقانى مەن مەيىرىمىنە بولەنىپ وتىرعان بالانىڭ كەنەتتەن ۇيىنەن جىراقتاپ، جات تىلدە سويلەيتىن بوتەن ادامدار وقيتىن مەكتەپ-ينتەرناتتان ءبىر-اق شىققانىن ءتۇسىنۋ قيىن. بىراق ول سىنبادى، بارىنە توتەپ بەردى. مەكتەپتى، ارتىنشا ۋنيۆەرسيتەتتى ءبىتىردى. كاسىبي جۋرناليست، تابىستى مودەل رەتىندە تۇلعا بولىپ قالىپتاستى»،—دەدى ول.
مۇحتار جاكىشەۆ الەۋمەتتىك جەلىدە قىزىنىڭ تاڭداۋى مەن كۇيەۋ بالاسىنىڭ ۇلتىنا قاتىستى ايتىلعان سىن-پىكىرلەرگە جاۋاپ بەرىپ، ادامنىڭ قادىرى ۇلتىمەن ەمەس، ار-وجدانى جانە ادامگەرشىلىگىمەن ولشەنەتىنىن اتاپ ءوتتى.
«ناعىز نامىس كۇيەۋ بالانىڭ ۇلتىمەن ولشەنبەيدى. نامىس دەگەنىمىز سول نامىس ءۇشىن تىم جوعارى باعا تولەۋگە تۋرا كەلگەندە، ادامدىق ارىڭ مەن ابىرويىڭدى تازا ساقتاپ قالا الۋىڭمەن ولشەنەدى! ۇلتتىڭ جامانى بولمايدى. جامان ادامدار بولادى. قالعان دۇنيەنىڭ ءبارى وسى قاراپايىم قاعيدانىڭ سالدارى عانا. ار-ۇجدانىن مانساپقا ايىرباستاپ، ماعان قارسى ءىستى قولدان قۇراستىرعان تەرگەۋشىلەردىڭ، پروكۋرورلار مەن سۋديالاردىڭ ىشىندە بىردە-ءبىر شەتەلدىك بولعان جوق. مەنى سونداي «قۇدالاردان» ساقتاعان جاراتقانعا مىڭ شۇكىر. ماعان ءوز قۇدالارىم ۇنايدى. ولاردىڭ اۋلەتى ۇلىبريتانيادا تۇرىپ جاتقانىنا جەتپىس جىلدان اسسا دا، ءوز تامىرلارىن ۇمىتپاعان. تويعا ولاردىڭ كوبى وزدەرىنىڭ ۇلتتىق كيىمدەرىن كيىپ كەلىپ، ءوز تەگىنە دەگەن قۇرمەتىن ەرەكشە كورسەتتى»،–دەدى كاسىپكەر.
