«Qazatomöndırıs» ūlttyq kompaniiasynyŋ būrynǧy basşysy, käsıpker Mūhtar Jäkışev qyzy Altynai Jäkışevanyŋ şeteldık azamatqa tūrmysqa şyqqanyn mälımdedı. Būl turaly ol äleumettık jelıdegı paraqşasynda jazdy, dep habarlaidy «Adyrna» tılşısı.
Saiasatker küieu balasy Karlmen Altynaidyŋ alty jyldan berı tanys ekenın, al ekı jyl būryn onyŋ Almatyǧa arnaiy kelıp, qyzynyŋ qolyn sūraǧanyn aitty.
«5 mausym künı qyzymnyŋ ūzatu toiy öttı. Men Altynai üşın şeksız baqyttymyn. Būl taŋdau kezdeisoq nemese asyǧys jasalǧan joq. Onyŋ negızınde şynaiy, päk mahabbat jatyr. Karl ekeuı alty jyldan berı tanys. Osydan ekı jyl būryn Karl Almatyǧa arnaiy kelıp, aldymnan öttı. Men öz batamdy berdım. Karl maǧan ūnaidy. Onyŋ azamattyq ūstanymy dūrys, aldyna qoiǧan maqsattary aiqyn ärı auqymdy. Onyŋ eŋbekqorlyǧyna, bılımıne jäne alǧan betınen qaitpaityn qaisarlyǧyna qarap, közdegen şyŋdaryn baǧyndyratynyna kämıl senemın. Bıraq men üşın eŋ maŋyzdysy – qyzymdy şyn jürekten, tereŋ ärı näzık sezımmen süietını»,– dedı Jäkışev.
Biznesmen būl toidyŋ özı üşın erekşe mänge ie bolǧanyn aitty. Onyŋ sözınşe, ülken qyzy tūrmysqa şyqqanda özı türmede bolǧandyqtan, toiǧa qatysa almaǧan.
«Būl toidyŋ mänı men üşın tym bölek. Ülken qyzym tūrmysqa şyqqanda men türmede otyrdym. Ol kezde äke retınde qolymnan bar kelgenı Aigerımıme arnaǧan aq tılegımdı qaǧazǧa tüsırıp, hatpen berıp jıberu ǧana boldy. Sol hat toiynda oqyldy. Al bügın bärı basqaşa. Qyzyŋnyŋ quanyşynda qaǧazdaǧy qūrǧaq sözben şektelmei, sözı qaǧazdan ǧana oqylatyn adam bolmaudyŋ özı bır ǧanibet. Qyzyŋdy özıŋ ūzatyp, osynau ömırlık maŋyzy bar aq bosaǧadan attar sätınde Altynaiyŋa jürekjardy jyly sözderıŋdı özıŋ aita aluyŋ netken baqyt! Menı tūtqyndaǧanda Altynai ne bary 9 jasta ǧana edı. Bostandyqqa şyqqanymda ol jiyrmaǧa tolypty. Ol mensız eseidı. Ol bala künınde-aq, menı janūiamyz arqyly körsetıletın qysymnan qūtqaru üşın, tuǧan üiın tastap jat jerge ketuge mäjbür boldy, böten elde östı. Ata-anasynyŋ aialy alaqany men meiırımıne bölenıp otyrǧan balanyŋ kenetten üiınen jyraqtap, jat tılde söileitın böten adamdar oqityn mektep-internattan bır-aq şyqqanyn tüsınu qiyn. Bıraq ol synbady, bärıne tötep berdı. Mekteptı, artynşa universitettı bıtırdı. Käsıbi jurnalist, tabysty model retınde tūlǧa bolyp qalyptasty»,—dedı ol.
Mūhtar Jäkışev äleumettık jelıde qyzynyŋ taŋdauy men küieu balasynyŋ ūltyna qatysty aitylǧan syn-pıkırlerge jauap berıp, adamnyŋ qadırı ūltymen emes, ar-ojdany jäne adamgerşılıgımen ölşenetının atap öttı.
«Naǧyz namys küieu balanyŋ ūltymen ölşenbeidı. Namys degenımız sol namys üşın tym joǧary baǧa töleuge tura kelgende, adamdyq aryŋ men abyroiyŋdy taza saqtap qala aluyŋmen ölşenedı! Ūlttyŋ jamany bolmaidy. Jaman adamdar bolady. Qalǧan dünienıŋ bärı osy qarapaiym qaǧidanyŋ saldary ǧana. Ar-ūjdanyn mansapqa aiyrbastap, maǧan qarsy ıstı qoldan qūrastyrǧan tergeuşılerdıŋ, prokurorlar men sudialardyŋ ışınde bırde-bır şeteldık bolǧan joq. Menı sondai «qūdalardan» saqtaǧan Jaratqanǧa myŋ şükır. Maǧan öz qūdalarym ūnaidy. Olardyŋ äuletı Ūlybritaniiada tūryp jatqanyna jetpıs jyldan assa da, öz tamyrlaryn ūmytpaǧan. Toiǧa olardyŋ köbı özderınıŋ ūlttyq kiımderın kiıp kelıp, öz tegıne degen qūrmetın erekşe körsettı»,–dedı käsıpker.
