قازاقستان پرەزيدەنتى قاسىم-جومارت توقاەۆ موڭعولياعا مەملەكەتتىك ساپارى اياسىندا ۇلان-باتىر قالاسىنداعى شىڭعىس حان ۇلتتىق مۋزەيىن ارنايى باردى. بۇل تۋرالى اقوردا جاريالادى، دەپ حابارلايدى “ادىرنا” ۇلتتىق پورتالى.
2019 جىلى اشىلعان مۋزەي قورىندا 10 مىڭنان استام بىرەگەي جادىگەر بار. ەكسپوزيتسيانىڭ نەگىزگى بولىگى ۇلى قولباسشى ءارى جيھانگەر شىڭعىس حان تۇلعاسىنا ارنالعان. بۇدان بولەك كورمەدە عۇن داۋىرىنەن باستاپ XX عاسىرعا دەيىنگى موڭعول مەملەكەتىنىڭ قالىپتاسۋ كەزەڭدەرىن تولىق قامتيتىن ارتەفاكتىلەر قويىلعان.
مۋزەيدىڭ تاعى ءبىر ماڭىزدى مىندەتى – ەۋرازيا حالىقتارىنىڭ كوشپەلى وركەنيەتى مەن مادەني مۇراسىن زەرتتەۋ جانە ونى جان-جاقتى دارىپتەۋ.
مەملەكەت باسشىسى مۋزەيدى ارالاپ كورىپ، قۇرمەتتى قوناقتار كىتابىنا: «شىڭعىس حان ۇلتتىق مۋزەيى – ۇلى تۇلعانىڭ جانە تۇتاس مەملەكەتتىڭ شەجىرەسى. رۋحانيات ورداسى ەل يگىلىگىنە قىزمەت ەتە بەرسىن. موڭعوليا حالقىنىڭ مەرەيى ۇستەم بولسىن!» دەپ جىلى لەبىزىن قالدىردى.
