Еуразиялық экономикалық одақ аясында мүше елдің ұйымнан шығуы немесе мүшелігін тоқтату әзірге қарастырылмаған, деп хабарлайды "Адырна" ұлттық порталы.
Бұл туралы РФ вице-премьері Алексей Оверчук мәлімдеді.
Оның айтуынша, қазіргі уақытта мұндай құқықтық механизмдер ЕАЭО туралы шартта жоқ, сондықтан «мүшелікті тоқтату» немесе «шығару» сияқты тетіктерді жан-жақты құқықтық тұрғыдан зерттеу қажет.
«Біз тоқтата тұру не білдіретінін зерттейміз. Қазіргі шартта мүшелікті тоқтату немесе шығару режимі қарастырылмаған. Сондықтан бұл мәселе құқықтық тұрғыдан мұқият қаралуы тиіс, желтоқсанға дейін пысықтаймыз», – деді Оверчук.
Бұған дейін, 29 мамырда Астанада өткен Жоғары Еуразиялық экономикалық кеңес отырысында Беларусь, Қазақстан, Қырғызстан және Ресей президенттері Арменияның ЕАЭО-дағы мүшелігі мәселесін келесі отырыста қайта қарау туралы бірлескен мәлімдеме қабылдаған.
