ءبىر كۇنگە قارقارالى قىمىزدىڭ استاناسىنا اينالدى. ءداستۇرلى دالا سۋسىنىنان ءدام تاتۋ ءۇشىن قازاقستاننىڭ تۇكپىر-تۇكپىرىنەن 20 مىڭنان استام ادام كەلدى. وندىرۋشىلەر فەستيۆالگە 30 توننا ۇلتتىق سۋسىن الىپ كەلدى.
مەرەكەنىڭ اشىلۋ سالتاناتىندا قاراعاندى وبلىسىنىڭ اكىمى ەرماعانبەت بولەكپاەۆ داستۇرلەردى ساقتاۋدىڭ ماڭىزدىلىعىنا توقتالدى.
– بۇگىندە تەحنولوگيالار الەمى قارىشتاپ دامىعان سايىن ادامدار تابيعي ونىمدەردى بۇرىنعىدان دا جوعارى باعالاي باستادى. سوندىقتان بۇكىل الەمدە ورگانيكالىق ونىمدەر مەن ەكولوگيالىق تازا تاعامدارعا دەگەن قىزىعۋشىلىق ارتىپ كەلەدى. قازاق حالقى ءۇشىن بۇل جاڭالىق ەمەس. اتا-بابالارىمىز ەجەلدەن تابيعاتپەن ۇندەستىكتە ءومىر سۇرگەن. سول تابيعي تازالىقتىڭ ءدامى قىمىزدىڭ قۇرامىندا ساقتالعان. بۇگىندە قىمىز – تەك ءداستۇردىڭ ءبىر بولىگى عانا ەمەس، سونىمەن قاتار زاماناۋي ەكونوميكانىڭ، گاسترونوميالىق ءتۋريزمنىڭ جانە ۇلتتىق برەندتىڭ ماڭىزدى ەلەمەنتى. ءار حالىقتى ونىڭ تاريحى مەن مادەنيەتى عانا ەمەس، ۇلتتىق تاعامدارى ارقىلى دا تانيدى، – دەدى ءوڭىر باسشىسى.
فەستيۆال ۇيىمداستىرۋشىلارى مەن قاتىسۋشىلارىنا قازاقستان رەسپۋبليكاسى پارلامەنتىنىڭ سەناتى مەن ماجىلىسىنەن، سونداي-اق پرەمەر-ءمينيستردىڭ ورىنباسارى، مادەنيەت جانە اقپارات ءمينيسترى ايدا بالاەۆادان قۇتتىقتاۋ حاتتار جولداندى.
بيىلعى بايقاۋدا ۇزدىك اتانۋ ءۇشىن 37 قىمىز ءوندىرۋشى باق سىناۋدا.
– بايقاۋعا قاتىسۋشىلاردىڭ ارقايسىسى مۇقيات ىرىكتەۋدەن ءوتتى. ءبىز سۋسىنعا زەرتحانالىق تالداۋ جۇرگىزىپ، شارۋاشىلىقتاردىڭ جۇمىسىمەن تانىستىق. ەندى ءوز باعاسىن قازىلار القاسى بەرەدى. ونىڭ قۇرامىندا سەگىز ادام بار: عالىم-بيوحيميكتەر، قوعام جانە مادەنيەت قايراتكەرلەرى. سونىمەن قاتار فەستيۆال قوناقتارى اراسىندا ونلاين جانە وفلاين داۋىس بەرۋ دە ۇيىمداستىرىلعان، – دەيدى BaiQymyz جوباسىنىڭ اۆتورى جۇماجان قالتاەۆ.
قازىلار القاسىنىڭ قۇرامىندا بەلگىلى قوعام قايراتكەرى، الەمگە تانىمال قازاقستاندىق ءانشى ديماش قۇدايبەرگەننىڭ اكەسى قانات ايتباەۆ تا بار.
– قاتىسۋشىلار اراسىنان بىرەۋىن ءبولىپ-جارىپ، ۇزدىك دەپ تاڭداۋ وتە قيىن. ۇسىنىلعان ونىمدەردىڭ بارلىعى جوعارى دەڭگەيدە دايىندالعان. ءبىز بارىنشا ءادىل باعامىزدى بەرۋگە تىرىسامىز. بۇل فەستيۆال قارقارالىنىڭ كوركەم تابيعات اياسىندا ءوتۋى ەرەكشە مانگە يە. مۇنداي شارالار قازاق مادەنيەتى مەن داستۇرلەرىن ناسيحاتتاپ قانا قويماي، ءوڭىردىڭ تۋريستىك الەۋەتىن دامىتۋعا دا ىقپال ەتەدى، – دەيدى قانات ايتباەۆ.
قاتىسۋشىلار قاتارىندا قارقارالى اۋدانىنىڭ قىمىز وندىرۋشىلەرى دە بار. مەرەكەنىڭ امباسسادورلارى – تەگىسشىلدىك اۋىلىنداعى «قارىنشي» شارۋا قوجالىعى. وتكەن جىلى ۇيىمداستىرىلعان العاشقى BaiQymyz فەستيۆالىندە ولار ەكىنشى ورىن يەلەنگەن بولاتىن. بيىل دا ولار جەڭىسكە جەتۋدى ماقسات ەتىپ وتىر.
قىمىز ءتۇرلى ۇلتتار مەن ەتنوستاردى بىرىكتىرەدى. ء«بىز ءبارىمىز قازاقپىز»، – دەيدى شارۋا قوجالىعىنىڭ باسشىسى الەكسەي ەفرەموۆ. ولاردىڭ كيىز ءۇيىنىڭ الدىندا ۇزىن-سونار كەزەك قالىپتاسقان. جۇبايى قىمىز قۇيىپ بەرىپ جاتسا، الەكسەي سول ساتتە ءداستۇرلى كۇبىدە قىمىز ءپىسىپ وتىردى.
– ۇلتتىق سۋسىندى ءداستۇرلى تەحنولوگيا بويىنشا دايىنداۋدى اۋىل اقساقالدارىنان ۇيرەندىم. بۇل كاسىپپەن كاسىبي تۇردە 12 جىلدان بەرى اينالىسامىن، ال بيەنى مەكتەپ كەزىمنەن باستاپ ساۋىپ كەلەمىن. مەنىڭ قىمىزىمنىڭ ەرەكشەلىگى – ونى ىستالعان قازى قوسىپ دايىندايتىنىمدا، – دەيدى الەكسەي ەفرەموۆ.
فەستيۆالگە قاراعاندى قالاسىنان تەگىن جەتۋگە مۇمكىندىگى دە جاسالدى: ارنايى اۆتوبۋس رەيستەرى ەكى باعىتتا دا ۇيىمداستىرىلدى.
قاراعاندىلىق زاۋرە ماديەۆا مەرەكەگە قاتىسۋ ءۇشىن تاڭعى ساعات بەستە تۇرعانىن ايتادى. ول بايقاۋعا قاتىسۋشىلاردىڭ باسىم بولىگىنىڭ قىمىزىنان ءدام تاتىپ ۇلگەرىپ، ءوزى ءۇشىن ۇزدىكتەرىن دە انىقتاپ قويعان.
– مەرەكە كەرەمەت ۇيىمداستىرىلعان. قوناقتارعا ەتتەن دە، باۋىرساقتان دا، قىمىزدان دا ءدام تاتقىزىپ، جىلى شىرايمەن كۇتىپ جاتىر. بارلىعى وتە ءدامدى. وسىنداي شارانى وتكىزگەن ۇيىمداستىرۋشىلارعا العىس ايتامىن. مۇنداي مەرەكەلەر ۇلتتىق داستۇرلەردى جاڭعىرتۋ ءۇشىن، جاس ۇرپاق سالتىمىزدى ءبىلىپ ءوسۋى ءۇشىن قاجەت، – دەيدى زاۋرە ماديەۆا.
مەرەكەدە قىمىزبەن قاتار قازاقتىڭ ءداستۇرلى تاعامدارىنىڭ دا الۋان تۇرىنەن ءدام تاتۋعا بولادى. الاڭدا فۋدتراكتار مەن فۋدكورتتار جۇمىس ىستەدى.
ۇلتتىق سپورت تۇرلەرىنىڭ جانكۇيەرلەرى ءۇشىن دە قىزىقتى باعدارلامالار ازىرلەنگەن.
قوناقتار بايگە، كوكپار، اۋدارىسپاق، ءداستۇرلى ساداق اتۋ، جامبى اتۋ جانە تەڭگە ءىلۋ جارىستارىن تاماشالاي الادى.
ەرماعانبەت بولەكپاەۆ جارىسقا قاتىسۋشىلاردى قۇتتىقتاپ، ولارعا ساتتىلىك تىلەپ، جەڭىسكە جەتۋلەرىنە تىلەكتەس ەكەنىن ءبىلدىردى.
ال باستى ساحنادا شىعارماشىلىق ۇجىمدار ونەر كورسەتىپ، مەرەكەلىك كوڭىل كۇي سىيلاۋدا.
فەستيۆال كەشكە دەيىن جالعاسادى.
قاتىسۋشىلاردى ەڭ ماڭىزدى ءسات – جالپى جۇلدە قورى 10 ميلليون تەڭگەنى قۇرايتىن «ۇزدىك قىمىز» بايقاۋىنىڭ قورىتىندىسى كۇتىپ تۇر. باس جۇلدە – ءبىرىنشى ورىن ءۇشىن 5 ميلليون تەڭگە.
