«قازمۇنايگاز» بۇعان دەيىن كاسىپكەر قايرات بورانباەۆقا تيەسىلى بولعان مۇناي ءوندىرۋشى «Phystech II» كومپانياسىن ءوز مەنشىگىنە الدى. بۇل تۋرالى قارجىلىق ەسەپتىلىك دەپوزيتاريىندە جاريالانعان دەرەكتەردەن بەلگىلى بولدى، دەپ حابارلايدى «ادىرنا» ءتىلشىسى.
ماڭعىستاۋ وبلىسىنداعى سولتۇستىك قاراجانباس كەن ورنىندا مۇناي-گاز وندىرەتىن كاسىپورىن 29 مامىردا ۇلتتىق كومپانيانىڭ تەڭگەرىمىنە بەرىلگەن.
2023 جىلعى قازان ايىندا «Phystech II» كومپانياسى قارجى مينيسترلىگىنىڭ مەملەكەتتىك مۇلىك جانە جەكەشەلەندىرۋ كوميتەتىنىڭ مەنشىگىنە 35,4 ملرد تەڭگەگە وتكەن بولاتىن. ودان كەيىن بۇل اكتيۆ «سامۇرىق-قازىنا» قورىنىڭ باسقارۋىنا بەرىلىپ، ول ونى مەملەكەتتىك مۇلىك كوميتەتىنەن 8,1 ملرد تەڭگەگە ساتىپ العان. كەيىننەن بيلىك كومپانيانى جەكەمەنشىككە بەرۋ جوسپارىن قاراستىرعان.
2023 جىلعى 3 قازانعا دەيىن Phystech II-ءنىڭ جالعىز اكتسيونەرى تىكەلەي قايرات بورانباەۆتىڭ ءوزى بولعان. كەيىن كومپانيانىڭ 99,28%-ى «قازسترويپروەكت-ا» ينۆەستيتسيالىق-دەۆەلوپەرلىك جشس-ءنىڭ يەلىگىنە وتكەن. ال رەسمي تۇردە كومپانيا قارجى مينيسترلىگىنىڭ مەنشىگىنە 2024 جىلدىڭ II توقسانىندا عانا بەرىلگەن.
«Phystech II» گەولوگيالىق بارلاۋ جانە ىزدەستىرۋ جۇمىستارىن جۇرگىزەدى، مۇناي كەن ورىندارىن يگەرۋمەن جانە مۇناي وندىرۋمەن اينالىسادى. كومپانيا 2015 جىلى ماڭعىستاۋ وبلىسىنىڭ اقتاۋ قالاسىندا تىركەلگەن.
