1 ماۋسىم – حالىقارالىق بالالاردى قورعاۋ كۇنىنە وراي تۇڭعىش پرەزيدەنت اتىنداعى الاڭدا مەرەكەلىك ءىس-شارا ۇيىمداستىرىلدى. وعان وبلىس اكىمى ناريمان تورەعاليەۆ قاتىستى.
ايماق باسشىسى الدىمەن جاس دارىندار گالەرەياسىن تاماشالادى. شىعارماشىلىق كورمەدە شاكىرتتەر جارقىن جەتىستىكتەرى مەن تىڭ جوبالارىن تانىستىردى. وسكەلەڭ ۇرپاقتىڭ عىلىمي ىزدەنىستەرى، ەكولوگيالىق جانە اسكەري-پاتريوتتىق باعىتتاعى باستامالارى كوپشىلىك نازارىنا ۇسىنىلدى. ونەرلى ورەندەر شىعارماشىلىق جوسپارىمەن ءبولىستى. سونداي-اق جاس قۇتقارۋشىلار مەن ءتارتىپ ساقشىلارى ساپ تۇزەپ، ۇيىمنىڭ ماقسات-مىندەتتەرىن باياندادى.
مەرەكەلىك شارانىڭ سالتاناتتى ساتىندە وبلىس اكىمى حالىقارالىق جانە رەسپۋبليكالىق ءبىلىم باسەكەلەرىندە ءوڭىر نامىسىن قورعاپ، كوش باسىنان كورىنگەن 90 وقۋشىعا العىس حات پەن 120 مىڭ تەڭگە كولەمىندەگى قارجىلاي سەرتيفيكاتتاردى تابىس ەتتى.
ايماق باسشىسى بالالاردىڭ قۇقىقتارىن قورعاۋ، ولاردىڭ ساپالى ءبىلىم الىپ، دەنساۋلىعىن نىعايتۋىنا، شىعارماشىلىق پەن سپورتتا شىڭدالۋىنا جاعداي جاساۋ – مەملەكەتتىك ساياساتتىڭ باستى باسىمدىقتارىنىڭ ءبىرى ەكەنىن ايتتى. بۇل باعىتتا وڭىردە اۋقىمدى جۇمىستار اتقارىلۋدا. ماسەلەن، سوڭعى 3 جىلدا 30 مەكتەپ سالىندى. ونىڭ 9-ى «كەلەشەك مەكتەپتەرى» ۇلتتىق جوباسى اياسىندا بوي كوتەرسە، قازىرگى تاڭدا 8 ءبىلىم ورداسىنىڭ قۇرىلىسى جۇرگىزىلۋدە.
— مەملەكەت باسشىسى قاسىم-جومارت كەمەلۇلى اتاپ وتكەندەي، جاس ۇرپاقتىڭ بويىندا «ادال ازامات» تۇجىرىمداماسىنا ساي قاعيداتتاردى قالىپتاستىرۋ – ورتاق مىندەتىمىز. ءبىز بۇكىل قوعام بولىپ بالالارىمىزدى ەڭبەكقورلىققا، ۋاقىت تالابىنا ساي ىزدەنۋگە باۋلۋىمىز قاجەت. جاس ۇرپاقتىڭ ساپالى ءبىلىم، سانالى تاربيە الۋى ءۇشىن بارلىق جاعداي جاسالىپ جاتىر. بۇل ستراتەگيالىق ءىس-شارالار جۇيەلى تۇردە جالعاسا بەرەدى، — دەدى وبلىس اكىمى.
مەرەكەلىك ءىس-شارا جاس ونەرپازداردىڭ كونتسەرتتىك باعدارلاماسىمەن تۇيىندەلدى.
