قر پارلامەنتى ءماجىلىسى دەپۋتاتى قازىبەك يسا ءماجىلىستىڭ وتىرىسىندا قانداستاردان قازاق تىلىنەن ەمتيحان تاپسىرۋدى تالاپ ەتۋ - زاڭسىزدىق ەكەنىن ايتىپ، ۇكىمەتتىڭ ءۇش مينيسترلىگىنىڭ پيلوتتىق جوباسىنىڭ قاتەلىگىن اشكەرەلەپ بەردى.
2026 جىلى 28 مامىردا قر پارلامەنتى ءماجىلىسىنىڭ جالپى وتىرىسىندا ءماجىلىس دەپۋتاتى قازىبەك يسا كوشى-قون تۋرالى ماسەلەگە وراي ەڭبەك مينيسترلىگىن قاتاڭ سىنادى. ءبىز دەپۋتات ءسوزىنىڭ ۆيدەوسى مەن جازباشا تولىق نۇسقاسىن جاريالاپ وتىرمىز.
قازىبەك يسا، قر پارلامەنتى ءماجىلىسىنىڭ دەپۋتاتى:
-مەنىڭ سۇراعىم ەڭبەك جانە حالىقتى الەۋمەتتىك قورعاۋ ءبىرىنشى ۆيتسە-ءمينيسترى ەربول تۇياقباەۆتىڭ كوشى-قون ماسەلەسىنە بايلانىستى ازاماتتىق الۋ تۋرالى سوزىنەن تۋىنداپ وتىر.
ازاماتتىق الۋ ءۇشىن مەملەكەتتىك تىلدەن ەمتيحان تاپسىرۋدى “اق جول” پارتياسى تالاي رەت كوتەرىپ، ازات پەرۋاشەۆ ەكى رەت، مەن ءۇش رەت دەپۋتاتتىق ساۋال جاساپ ءجۇرىپ، اقىرى 2024 جىلى مەن ءوز قولىممەن ۇسىنىپ، زاڭعا ەنگىزدىك. بۇل زاڭدى پارلامەنت قابىلداپ، پرەزيدەنت قول قويدى!
ال وسى ازاماتتىق الۋ تۋرالى زاڭنىڭ 17 بابى، 14 تارماقشاسىندا اق قاعازعا قارا سيامەن، تاسقا تاڭبا باسقانداي، سوقىرعا تاياق ۇستاتقانداي ەتىپ، مەملەكەتتىك تىلدەن ەمتيحان تاپسىرۋ ەتنيكالىق قازاقتارعا قولدانىلمايدى دەپ جازىلعان!
ال سىزدەر نە ىستەدىڭىزدەر!؟.
ءۇش مينيسترلىك - ەڭبەك مينيسترلىگى، جاساندى ينتەللەكت مينيسترلىگى جانە ىشكى ىستەر مينيسترلىگى بىرلەسىپ شىعارعان پيلوتتىق جوبادا قانداستارعا مەملەكەتتىك تىلدەن ەمتيحان تاپسىرتىپ قويعانسىزدار! سوندا پارلامەنت قابىلداعان، پرەزيدەنت قول قويعان زاڭدى ءۇش مينيسترلىك ۇستىنەن اتتاپ وتە بەرە مە؟!. بۇل ءۇش مينيسترلىك پارلامەنتتەن دە، ءتىپتى پرەزيدەنتتەن دە كۇشتى بولىپ تۇر ما؟!.
بۇل نە ماسقارا؟!.
ەگەر ءومىر بويى شەتەلدە، مىسالى قىتايدا، تاعى باسقا جەردە باسقا ءتىل، باسقا الفاۆيتتە، اراب پەن لاتىن گرافيكاسى الىپبيىندە ءومىر سۇرگەن قانداستارىمىزدان قازاق تىلىنەن ەمتيحان الۋ كەرەك بولسا، ەڭ الدىمەن وسى ەمتيحاندى زاڭسىز تالاپ ەتىپ، ەلدى شۋلاتقان پيلوتتىق جوبانى شىعارعان 3 مينيستر: ەڭبەك ءمينيسترى، ىشكى ىستەر ءمينيسترى، جاساندى ينتەللەكت مينيسترىنەن ەمتيحان السا، ولار دا تاپسىرا المايدى شىندىعىن ايتساق؟!.
كەشە عانا وتكەن سەنبىدە 23 مامىر كۇنى الماتىدا قانداستار كوشىنە توسقاۋىل قويىپ وتىرعان وسى پيلوتتىق جوبانىڭ قيسىنسىزدىعى تۋرالى دۇنيەجۇزىلىك قازاقتار قاۋىمداستىعى فيليالىنىڭ ۇيىمداستىرۋىمەن ۇلكەن جيىن بولدى. مەنى شاقىرعان سوڭ، ارنايى بارىپ قاتىستىم، 150-دەي ادام كەلدى. سوناۋ اباي وبلىسىنداعى ماقانشىدان كەلدى ادامدار مۇگەدەك بالاسىنا ازاماتتىق الا الماي جۇرگەن. ءبارى پيلوتتىق جوبانىڭ زاڭسىز كەدەرگىسىن ايتىپ زارلادى. كوز جاسىن كول ەتىپ جىلادى سويلەي الماي كورگەن قورلىعىن ايتىپ.
جيىنعا قاتىسقان ازاماتتار ءبىراۋىزدان قارسى شىعۋدا نەگىزسىز تەست تاپسىرۋعا.
وندا ۇكىمەت باسشىلارى مەن مينيسترلەردەن، اكىمدەردەن، قازاقستانداعى بارلىق مەملەكەتتىك قىزمەتكەرلەردەن باستاۋ كەرەك مەملەكەتتىك تىلدەن ەمتيحان الۋدى قانداستاردان بۇرىن؟! سوندا ءادىل بولادى!
سوندىقتان ءبىز ۇكىمەتكە، پرەمەرگە پيلوتتىق جوباعا وزگەرىس ەنگىزۋ تۋرالى جازباشا دەپۋتاتتىق ساۋال جىبەردىك. ال بۇل ساۋالعا ەڭبەك مينيسترىنەن كەلگەن جاۋاپ كۇلكىلى! مەن پيلوتتىق جوبانىڭ قاتەلىگىن كوزگە شۇقىپ كورسەتىپ بەرسەم، مينيستر ماعان پيلوتتىق جوبانىڭ ەرەجەسىن سالىپ جىبەرىپتى؟..
قانداستاردان قازاق تىلىنەن تەست الۋ بارىپ تۇرعان زاڭسىزدىق!؟.
پيلوتتىق جوباعا وزگەرىس ەنگىزۋ كەرەك!
ەڭبەك جانە حالىقتى الەۋمەتتىك قورعاۋ ءبىرىنشى ۆيتسە-ءمينيسترى ەربول تۇياقباەۆ:
-سۇراعىڭىزعا راحمەت قازىبەك جارىلقاسىنۇلى.
مىناۋ پيلوتتىق جوبانىڭ ماقساتىن ايتىپ ءوتتىم، بۇل ەلگە بىلىكتى كادرلاردى تارتۋ. ال زاڭناما جاعىنا كەلەتىن بولساق، جاڭا سپيكەر مىرزا اتاپ وتكەندەي باسقا دا زاڭ جوباسى بۇل زاڭدا قاراستىرىلماعان. ول جەكە پاكەتپەن ازىرلەنىپ جاتىر. سۇراقتاردى قوسىمشا سول جاقتا تالقىلايىق جۇمىس توبى شەڭبەرىندە. ءبىز وعان دايىنبىز. راحمەت!
تولىق نۇسقانى سىلتەمەدەن وقي الاسىزدار.
