مانەرلەپ سىرعاناۋشى ميحايل شايدوروۆ وليمپيادا چەمپيونى اتانعاننان كەيىن وزىنە جانە باپكەرلەر قۇرامىنا جالاقى تولەۋ تولىق توقتاتىلعانىن مالىمدەدى. بۇل تۋرالى سپورتشى تيمۋر بالىمبەتوۆكە بەرگەن سۇحباتىندا ايتتى، دەپ حابارلايدى «ادىرنا» ءتىلشىسى.
ول جاڭا ماۋسىمعا دايىندالۋ ۋاقىتى كەلگەنىن جەتكىزدى.
«5 ايدان بەرى ماعان جالاقى تولەنبەي كەلەدى. قازىر كەلەسى ماۋسىمعا دايىندالۋىم كەرەك، بىراق قالاي دايىندالارىمدى تۇسىنبەيمىن. وقۋ-جاتتىعۋ جيىندارى جوسپارلانعان، باعدارلامامدى قوياتىن كۇندەر دە بەلگىلەنگەن. باعدارلاما قويۋ شىعىندارىن تولەي مە دەپ بىرنەشە رەت سۇرادىق. ءار ادام ارقالاي سويلەيدى. ماعان ەشتەڭە تۇسىنىكتى ەمەس. نەگىزى مەن «مەنى قولدامايدى» دەپ اشىق ايتقاندى ۇناتپايمىن. جالاقىمدى نە ءۇشىن جاريالاعاندارىن دا تۇسىنبەيمىن. بۇعان دەيىن ەشقاشان مۇنداي ماسەلە كوتەرمەگەنمىن. تەك 2025 جىلى ماعان قولداۋ كەرەك ەكەنىن، مۇز ايدىنى قاجەت ەكەنىن ايتتىم»،–دەدى سپورتشى.
شايدوروۆ وزىنە قاتىستى قارجىلىق اقپاراتتىڭ جاريا بولۋىن زاڭعا قايشى دەپ سانايتىنىن اتاپ ءوتتى.
«نەگىزى بۇل تاقىرىپتا كوپ سويلەگەندى ۇناتپايمىن. بارلىعىمەن قارىم-قاتىناسىم دا كۇردەلى. مەن تەك دامىپ، سىرعاناعىم كەلەدى. مەن ءۇشىن ەلىمىزدىڭ التىن قورىنداعى سپورتشى بولىپ قالىپ، كوك تۋىمىزدى ءاردايىم كوتەرىپ ءجۇرۋ ماڭىزدى. سەبەبى مەنىڭ الەۋەتىم وتە جوعارى»،–دەدى ول.
ايتا كەتەيىك، ميحايل شايدوروۆ 2026 جىلعى قىسقى وليمپيادادا قازاقستانعا مانەرلەپ سىرعاناۋدان تۇڭعىش التىن مەدال سىيلاعان بولاتىن.
