قاراعاندىدا دەمالىس پەن مادەني ءىس-شارالارعا ارنالعان اۋقىمدى جوبانى جۇزەگە اسىرۋ باستالدى. قالادا مۇلدە جاڭا فورماتتاعى Keruen Karaganda ساۋدا-ويىن-ساۋىق ورتالىعى سالىنادى.
اۋماعى 180 مىڭ شارشى مەتردەن اساتىن كوپفۋنكتسيونالدى كەشەندە زاماناۋي كىتاپحانا، بىرنەشە زالدان تۇراتىن كينوتەاتر، جىل بويى جۇمىس ىستەيتىن مۇز ايدىنى، تاقىرىپتىق بالالار پاركى، كونتسەرتتىك جانە ءتۇرلى ءىس-شارالارعا ارنالعان الاڭدار ورنالاستىرىلادى.
جاڭا ورتالىق قالالىق ءومىردىڭ ماڭىزدى كەڭىستىگى رەتىندە جوبالانعان. مۇندا فەستيۆالدەر، كورمەلەر، گاسترونوميالىق جارمەڭكەلەر، سپورتتىق ءىس-شارالار مەن مۇز شوۋلارىن وتكىزۋ جوسپارلانىپ وتىر.
— اۋماعى 180 مىڭ شارشى مەتردى قۇرايتىن جاڭا ورتالىق Keruen جەلىسىندەگى ەڭ ءىرى نىسان ءارى قازاقستانداعى ەڭ اۋقىمدى كەشەندەردىڭ بىرىنە اينالادى. مۇندا الەمدىك جانە وتاندىق ۇزدىك برەندتەر، فۋدكورتتار، بالالارعا ارنالعان ويىن-ساۋىق الاڭدارى، سونداي-اق زاماناۋي كىتاپحانا ۇسىنىلادى. ەڭ باستىسى، جوبانىڭ جۇزەگە اسۋى ءوڭىر ەكونوميكاسىنىڭ دامۋىنا جاڭا سەرپىن بەرەدى: كەمىندە 3900 جۇمىس ورنى اشىلىپ، سالىق تۇسىمدەرى ارتادى، جاستار مەن كاسىپكەرلەر ءۇشىن جاڭا مۇمكىندىكتەر پايدا بولادى، — دەپ اتاپ ءوتتى قاراعاندى وبلىسىنىڭ اكىمى ەرماعانبەت بولەكپاەۆ.
جوبانى KeruenCity Karaganda جشس جۇزەگە اسىرادى. ساۋلەتتىك تۇجىرىمدامانى ءىرى كوممەرتسيالىق جانە قوعامدىق كەڭىستىكتەردى جوبالاۋعا ماماندانعان لوندونداعى Chapman Taylor كومپانياسى ازىرلەگەن.
جوبادا تەك ساۋدا باعىتىنا عانا ەمەس، دەمالىس پەن مادەنيەت سالاسىن دامىتۋعا دا باسىمدىق بەرىلگەن.
نەگىزگى مىندەتتەردىڭ ءبىرى — ىشكى ءتۋريزمدى دامىتۋ.
— ءبىز Keruen Karaganda جوباسىن ادامدارعا ارنالعان كەڭىستىك رەتىندە سالىپ جاتىرمىز. بۇل جاي عانا ساۋدا ورتالىعى ەمەس، بۇكىل وتباسى جايلى ۋاقىت وتكىزە الاتىن ورىن بولادى. مۇندا اشىق اسپان اسەرىن بەرەتىن شىنى كۇمبەزدەر، جابىق اۆتوتۇراق، مۇز ايدىنى، وتباسىلىق پارك جانە جان-جاقتى ويلاستىرىلعان ينفراقۇرىلىم قاراستىرىلعان. ءتىپتى كەلۋشىلەر جىلى اۆتوبۋس ايالداماسىنان ليفتكە تىكەلەي ءوتىپ، سول ارقىلى ساۋدا-ويىن-ساۋىق ورتالىعىنا جايلى كوتەرىلە الاتىنداي جاعداي جاسادىق. ءبىزدىڭ مىندەتىمىز — ءاربىر بولشەكتى ەسكەرىپ، قاراعاندىدا تۇرعىندار ءسۇيىپ كەلەتىن جاڭا بۋىنداعى زاماناۋي ساۋدا ورتالىعىن قالىپتاستىرۋ، — دەيدى Keruen Karaganda كومپانياسىنىڭ باس ديرەكتورى گالينا زكرياەۆا.
كەشەن ەكى جەرۇستى قاباتىنان جانە جەراستى اۆتوتۇراعىنان تۇرادى.
جوبانى جۇزەگە اسىرۋ ەكى كەزەڭگە بولىنگەن: نەگىزگى بولىگىن 2027 جىلدىڭ سوڭىنا دەيىن اياقتاۋ جوسپارلانسا، ەكىنشى كەزەڭىن 2028 جىلى ىسكە اسىرۋ كوزدەلىپ وتىر.
جاڭا ساۋدا-ويىن-ساۋىق ورتالىعى تاتتىمبەت كوشەسىندە، «كۇنگەي» شاعىناۋدانى باعىتىنا قاراي ورنالاسادى.
