الەۋمەتتىك جەلىدە الماتىلىق جىگىتتىڭ كينوتەاترعا بارعاننان كەيىن قايتىس بولعانى تۋرالى اقپارات تارادى. الدىن الا مالىمەتكە سايكەس، ول پوپكورنعا قاقالعان، دەپ حابارلايدى "ادىرنا".
قايعىلى وقيعا تۋرالى اقپارات تەلەگرام ارنالاردىڭ بىرىندە پايدا بولدى. وندا 17 مامىر كۇنى جىگىتتىڭ سىنىپتاسىمەن بىرگە كينوتەاترعا بارعانى تۋرالى ايتىلعان.
"سەانس باستالار الدىندا جىگىت پوپكورن ساتىپ العان. تۋىستارىنىڭ ايتۋىنشا، جىگىت دارەتحانادا قۇسقان. وسىدان كەيىن ول ءوزىن جاقسى سەزىنەتىنىن ايتىپ، تانىسىمەن بىرگە كينوزالعا كىرگەن. الايدا ءبىراز ۋاقىتتان سوڭ تاماعى جىبىرلاپ تۇرعانىن جانە ءوزىن ناشار سەزىنە باستاعانىن ايتقان. كەيىن "جۇرەگىم قىسىلىپ تۇر" دەپ، تانىسىنا سىرت كيىمىن بەرگەننەن كەيىن ەسىنەن تانىپ قالعان. وقيعا كۋاگەرلەرى دارىگەرلەر كەلگەنگە دەيىن العاشقى كومەك كورسەتۋگە تىرىسقانىمەن، ونى امان الىپ قالۋ مۇمكىن بولمادى", – دەلىنگەن حابارلامادا.
الماتى قالاسى پوليتسيا دەپارتامەنتىنىڭ ءباسپاسوز قىزمەتى اتالعان دەرەك بويىنشا تۇسىنىك بەردى.
"بوستاندىق اۋداندىق پوليتسيا باسقارماسىنا قاراستى پوليتسيا ءبولىمى اتالعان فاكتى بويىنشا تەرگەۋ جۇرگىزىپ جاتىر. وقيعانىڭ ءمان-جايى انىقتالۋدا. تەكسەرۋ قورىتىندىسى بويىنشا قازاقستان رەسپۋبليكاسىنىڭ قولدانىستاعى زاڭناماسىنا سايكەس پروتسەسسۋالدىق شەشىم قابىلدانادى", – دەپ حابارلادى جەرگىلىكتى پوليتسيا.
