استانا اۋەجايى اۋماعىنداعى ارنايى تەحنيكا مەن قۇتقارۋ قىزمەتتەرىنىڭ كوبەيۋى تۇرعىندار مەن جولاۋشىلاردى الاڭداتپاۋى كەرەك. ويتكەنى، ول قالىپتى رەجيمدە جۇمىسىن جالعاستىرىپ جاتىر. بۇل تۋرالى اۋەجاي اكىمشىلىگى مالىمدەدى، دەپ حابارلايدى "ادىرنا".
22 مامىر كۇنى ساعات 12:00 مەن 14:00 ارالىعىندا نۇرسۇلتان نازارباەۆ حالىقارالىق اۋەجايى اۋماعىندا اۆياتسيالىق وقىس جاعداي كەزىندەگى ءىس-قيمىلداردى پىسىقتاۋعا ارنالعان جوسپارلى وقۋ-جاتتىعۋ وتەدى.
"وقۋ-جاتتىعۋ بارىسىندا اۋەجايدىڭ اۆاريالىق-قۇتقارۋ قىزمەتى استانا قالاسىنىڭ تجد، ءورت ءسوندىرۋ بولىمشەلەرى، جەدەل-قۇتقارۋ جاساعى، اپاتتار مەديتسيناسى ورتالىعى، 103 قىزمەتى جانە اۋە كومپانيالارىمەن بىرلەسىپ توتەنشە جاعداي كەزىندەگى ءوزارا ءىس-قيمىل ءتارتىبىن پىسىقتايدى. جاتتىعۋ كەزىندە اۋەجاي اۋماعىندا ارنايى تەحنيكا، ءورت ءسوندىرۋ كولىكتەرى مەن جەدەل قىزمەت ماماندارى بولۋى مۇمكىن", – دەلىنگەن حابارلامادا.
اۋەجاي اكىمشىلىگىنىڭ مالىمەتىنشە، جاتتىعۋ كەزىندە اۋماقتا ارنايى تەحنيكا، ءورت ءسوندىرۋ كولىكتەرى مەن جەدەل قىزمەت ماماندارى كوپتەپ ءجۇرۋى مۇمكىن. وسىعان بايلانىستى جولاۋشىلار مەن قالا تۇرعىندارىنان سابىر ساقتاپ، وقۋ-جاتتىعۋ جۇمىستارىنا تۇسىنىستىكپەن قاراۋ سۇرالادى.
