بۇگىن قازاقستان پرەزيدەنتى قاسىم-جومارت توقاەۆ پەن كەنيا پرەزيدەنتى ۋيليام رۋتو رەسمي كەزدەسۋ وتكىزىپ، ارتىنان وكىلدەرىنە ارنالعان بريفينگ بەردى. ەكى تاراپ تىكەلەي رەيس اشۋ، اۋىل شارۋاشىلىق ونىمدەرىن تاسىمالداۋ ماسەلەلەرى بويىنشا مازمۇندى كەلىسسوزدەر جۇرگىزگەنىن اتاپ ءوتتى. بۇل تۋرالى اقوردا جاريالادى، دەپ حابارلايدى "ادىرنا".
«كولىك، اۋىل شارۋاشىلىعى، اقپاراتتىق تەحنولوگيالار، تۋريزم، ونەركاسىپ جانە باسقا دا سالادا بىرلەسكەن جوبالاردى ىسكە اسىرۋعا ۋاعدالاستىق. ەلدەرىمىزدىڭ اراسىندا تۇراقتى تۇردە تىكەلەي اۋە رەيستەرىن اشۋ مۇمكىندىگى تۋرالى دا پىكىر الماستىق»، – دەپ اتاپ ءوتتى توقاەۆ.
ودان بولەك قازاقستان تاراپى افريكا نارىعىنا بيداي تاسىمالداۋعا دا قىزىعۋشىلىق تانىتىپ وتىر. وسى ماقساتتى افريكانىڭ سەگىز ەلىنە جول اشاتىن مومباسا پورتىن پايدالانباق.
ء«بىز اۋىل شارۋاشىلىعى ونىمدەرىن، ەڭ الدىمەن، بيدايدى جانە وزگە دە تاۋارلاردى افريكا نارىعىنا جەتكىزۋگە مۇددەلىمىز. وسى ماقساتپەن مومباسا پورتىن پايدالانۋ ماسەلەسىن قاراستىردىق. بۇل – وسى ايماقتىڭ سەگىز مەملەكەتىنە جول اشاتىن شىعىس افريكاداعى ەڭ ءىرى لوگيستيكا ورتالىعىنىڭ ءبىرى. سونىمەن قاتار ءبىز كەنيا ونىمدەرىن قازاقستان ارقىلى ەۋرازيا ەلدەرىنە جەتكىزۋ ماسەلەسىن تالقىلادىق. ساۋدا-ەكونوميكالىق ىقپالداستىقتى جاڭا دەڭگەيگە كوتەرۋ قاجەت ەكەنىن ايتتىق»، – دەدى مەملەكەت باسشىسى.
ءوز كەزەگىندە كەنيادان كەلگەن دەلەگاتسيا قازاقستاننىڭ Egov جۇيەسىندەگى، عارىش جانە اقپاراتتىق تەحنولوگيا سالالارىنداعى جەتىستىگىنە قىزىعۋشىلىق تانىتقان. ولار AlemاI حالىقارالىق جاساندى ينتەللەكت ورتالىعىنىڭ جانە قازاقستاننىڭ ۇلتتىق عارىش ورتالىعىنىڭ جۇمىسىمەن تانىستى.
