الەمگە تانىمال قازاقستاندىق ءانشى ديماش قۇدايبەرگەن بۇۇ-نىڭ كوشى-قون جونىندەگى حالىقارالىق ۇيىمىنىڭ (حكۇ) جاھاندىق ىزگى نيەت ەلشىسى رەتىندە بانگلادەشكە رەسمي ساپارمەن باردى. بۇل تۋرالى Dimashnews باسىلىمى جازدى، دەپ حابارلايدى “ادىرنا”.
ساپاردىڭ باستى ماقساتى – وڭىردەگى ءماجبۇرلى قونىس اۋدارعانداردىڭ جاعدايىمەن تانىسۋ جانە حالىقارالىق قاۋىمداستىقتىڭ نازارىن گۋمانيتارلىق داعدارىسقا اۋدارۋ.
17 مامىردا باستالعان گۋمانيتارلىق ميسسيا اياسىندا ديماش قۇدايبەرگەن بانگلادەشتىڭ كوكس-بازار وڭىرىنە باردى. بۇل ايماق – الەمدەگى ەڭ ءىرى ءماجبۇرلى قونىس اۋدارعان ادامدار (بوسقىندار) شوعىرلانعان مەكەندەردىڭ ءبىرى. قازىرگى ۋاقىتتا مۇندا تۇراقتى گۋمانيتارلىق قولداۋدى ومىرلىك قاجەتتىلىك ەتەتىن جۇزدەگەن مىڭ ادام تۇرىپ جاتىر.
بۇگىنگى تاڭدا حالىقارالىق كوشى-قون ۇيىمى مەن ونىڭ جەرگىلىكتى سەرىكتەستەرى لاگەر تۇرعىندارىن كەلەسىدەي بازالىق باعىتتار بويىنشا قامتاماسىز ەتىپ جاتىر:
- ۋاقىتشا تۇرعىن ۇيلەر مەن قاۋىپسىز باسپانا;
- جەدەل جانە جوسپارلى دەنساۋلىق ساقتاۋ قىزمەتى;
- بالالار مەن جاسوسپىرىمدەرگە ارنالعان ءبىلىم بەرۋ باعدارلامالارى;
- الەۋمەتتىك جانە پسيحولوگيالىق قولداۋ كورسەتۋ.
كوكس-بازار اۋدانىنداعى گۋمانيتارلىق جاعداي تەك الەۋمەتتىك ماسەلەلەرمەن شەكتەلمەيدى. وڭىردەگى كليماتتىق وزگەرىستەر مەن تابيعي قاۋىپ-قاتەرلەر بوسقىنداردىڭ ءومىرىن ودان ءارى قيىنداتىپ وتىر. ماۋسىمدىق سۋ تاسقىندارى، نوسەر جاۋىندار مەن جويقىن تسيكلوندار بۇل ايماقتا ءجيى ورىن الادى. مۇنداي تابيعي اپاتتار حالىقارالىق ۇيىمداردىڭ كومەك جەتكىزۋ پروتسەسىن كۇردەلەندىرىپ، جەرگىلىكتى قاۋىمداستىقتاردىڭ تۇرمىس جاعدايىنا تىكەلەي قاۋىپ ءتوندىرىپ وتىر.
ەلشى رەتىندە ديماش قۇدايبەرگەن ءوزىنىڭ مەديالىق تانىمالدىلىعى مەن جاھاندىق ىقپالىن پايدالانا وتىرىپ، دونور ەلدەر مەن حالىقارالىق ۇيىمداردىڭ نازارىن وسى ايماقتى تۇراقتى قارجىلاندىرۋ مەن دامىتۋ ماسەلەلەرىنە اۋدارۋدى كوزدەيدى.
