قازاقستاندا زەينەتاقى جيناعىنىڭ ەڭ تومەنگى جەتكىلىكتى شەگى 23-63 جاس ارالىعىنداعى ازاماتتار ءۇشىن 79%-عا دەيىن كوتەرىلۋى مۇمكىن. بۇل تۋرالى ەڭبەك جانە حالىقتى الەۋمەتتىك قورعاۋ ءمينيسترى اسقاربەك ەرتاەۆ وسىنداي مالىمدەمە جاسادى، دەپ حابارلايدى "ادىرنا".
ءمينيستردىڭ سوزىنە سۇيەنسەك، جاسىنا قاراي ءارتۇرلى بولادى، ياعني 23-35 جاس جانە 35-63 جاس ارالىعىنداعى ازاماتتارعا جەكە-جەكە ەسەپتەلەدى.
«بۇل ءارتۇرلى دەڭگەيدە بولادى – 23-تەن 35 جاسقا دەيىنگى جانە 35-تەن 63 جاسقا دەيىنگى ازاماتتار ءۇشىن قاراستىرىلعان. جالپى العاندا، ءوسىم شامامەن 79%-عا دەيىن جەتەدى. قازىر ءبىز فورمۋلانى، ەسەپتەۋلەردى بىرىڭعاي جيناقتاۋشى زەينەتاقى قورىمەن بىرگە دايىنداپ جاتىرمىز. بارلىعى رەسمي تۇردە جاريالانادى. وسى ايدىڭ سوڭىنا دەيىن ءبارىن ەگجەي-تەگجەيلى تۇسىندىرەمىز دەپ ويلايمىن»، – دەدى ول باق وكىلدەرىنە.
ونىڭ سوزىنشە، ەڭ تومەنگى جەتكىلىكتى شەگىن كوتەرۋ زەينەتاقى قاراجاتىن مەرزىمىنەن بۇرىن الۋدى ازايتۋعا باعىتتالعان، سەبەبى سوڭعى جىلدارى بۇل ءۇردىس ايتارلىقتاي ارتقان.
«بۇل اقشا الۋعا تىيىم سالىنادى دەگەن ءسوز ەمەس. زەينەتاقى قورىنان اقشا الۋ جالعاسا بەرەدى، بىراق ونى بارىنشا ازايتۋ قاجەت. تالداۋىمىزعا سۇيەنسەك، سوڭعى بەس جىلدا 5,7 ترلن تەڭگە الىنعان. ونىڭ باسىم بولىگى نەسيەلەردى جابۋعا جۇمسالعان»، – دەدى مينيستر.
ءمينيستردىڭ پىكىرىنشە، بانكتەر ءۇشىن زەينەتاقى قاراجاتىنىڭ جۇيەدەن شىعارىلۋى ءتيىمدى، ويتكەنى بۇل يپوتەكالىق نەسيە بەرۋگە مۇمكىندىك اشادى.
«ەڭبەك مينيسترلىگىنىڭ ۇستانىمى – اقشا جيناقتاۋ قاجەت. الەمنىڭ بارلىق ەلىندە جيناقتاۋشى قوردىڭ باستى مىندەتى – قاراجات جيناۋ. ءسىز دە، مەن دە بولاشاققا قارجى جيناۋىمىز كەرەك. زەينەت جاسىنا جەتكەندە سول قورداعى قاراجات ەسەبىنەن زەينەتاقى الۋىمىز ءتيىس»، – دەدى اسقاربەك ەرتاەۆ.
