ازەربايجان پرەزيدەنتى يلحام اليەۆ قازاقستاننىڭ حالىق جازۋشىسى، اقىن ءارى قوعام قايراتكەرى ولجاس سۇلەيمەنوۆتىڭ 90 جىلدىق مەرەيتويىنا وراي قۇتتىقتاۋ حاتىن جولدادى. بۇل تۋرالى Report جازدى، دەپ حابارلايدى "ادىرنا".
قۇتتىقتاۋ ماتىنىندە ازەربايجان باسشىسى ولجاس سۇلەيمەنوۆتى قازىرگى ادەبي ويدىڭ كورنەكتى وكىلى، تۇركى الەمىنىڭ بەدەلدى تۇلعالارىنىڭ ءبىرى رەتىندە اتاپ ءوتتى. سونداي-اق ونىڭ پوەزيا، پۋبليتسيستيكا، ادەبيەتتانۋ جانە زەرتتەۋ سالالارىنداعى ەڭبەكتەرىنە جوعارى باعا بەرىلدى.
“ۇلى اقىن، پۋبليتسيست، ادەبيەتتانۋشى جانە زەرتتەۋشى رەتىندە ءسىز تۋا بىتكەن كوركەمدىك تالانتىمەن ەرەكشەلەنەتىن تۇركى الەمىنىڭ ايتۋلى تۇلعالارىنىڭ ءبىرىسىز. ءسىزدىڭ شىعارمالارىڭىزعا ارقاۋ بولعان جوعارى ازاماتتىق مۇراتتار وقىرمان قاۋىمىنىڭ شىعارماشىلىعىڭىزعا دەگەن تەرەڭ سۇيىسپەنشىلىگىن ءاردايىم ارتتىرىپ كەلەدى. ۇلتتىق قۇندىلىقتار نەگىزىندە قالىپتاساتىن عالامدىق ويلاۋ تۋرالى سەنىممەن جازىلعان ءاربىر جاڭا تۋىندىڭىز جارقىن مادەني وقيعاعا اينالدى. ءسىزدىڭ جارقىن ادەبي تۇلعا رەتىندەگى باي ءومىر جولىڭىز — وتان مەن حالىققا ادال قىزمەت ەتۋدىڭ ۇلگىسى”، - دەدى اليەۆ.
حاتتا ولجاس سۇلەيمەنوۆتىڭ قوعامدىق-ساياسي قىزمەتىنە دە ەرەكشە نازار اۋدارىلعان. ازەربايجان باسشىسى ونىڭ 1980-جىلداردان بەرى قوعامدىق ارەنادا بەلسەندى قىزمەت اتقارىپ كەلە جاتقانىن، سونداي-اق ازەربايجاننىڭ ۇستانىمىن ۇنەمى قولداپ وتىرعانىن اتاپ ءوتتى.
سونىمەن قاتار يلحام اليەۆ ولجاس سۇلەيمەنوۆتىڭ تۇركى حالىقتارى اراسىنداعى ىنتىماقتاستىقتى نىعايتۋعا جانە گۋمانيتارلىق بايلانىستاردى دامىتۋعا قوسقان ۇلەسىن جوعارى باعالادى. پرەزيدەنت جازۋشىنىڭ ازەربايجانعا دەگەن ىقىلاسىن «دوستىق پەن باۋىرلاستىقتىڭ ايقىن كورىنىسى» دەپ سيپاتتادى.
قۇتتىقتاۋ سوڭىندا ازەربايجان پرەزيدەنتى مەرەيتوي يەسىنە زور دەنساۋلىق، شىعارماشىلىق تابىس تىلەپ، ونىڭ مول مۇراسى كەلەر ۇرپاق ءۇشىن ماڭىزدى رۋحاني قۇندىلىق بولىپ قالا بەرەتىنىنە سەنىم ءبىلدىردى.
