ورال قالاسىندا قاڭعىباس جانۋارلاردى اۋلاۋعا ارنالعان مەملەكەتتىك كەلىسىمشارتتىڭ ەت وڭدەۋمەن اينالىساتىن كومپانياعا بەرىلۋى قوعامدا قىزۋ تالقىلانا باستادى. بۇل جاعداي جانۋارلاردى قورعاۋشىلار مەن قالا تۇرعىندارىنىڭ الاڭداۋشىلىعىن كۇشەيتتى، دەپ حابارلايدى “ادىرنا”.
CMN.KZ مالىمەتىنشە، «وركەن» جشس جىل سوڭىنا دەيىن ەكى مىڭعا جۋىق قاڭعىباس جانۋاردى اۋلاۋ بويىنشا 9,4 ميلليون تەڭگەگە جۋىق كەلىسىمشارتتى جەڭىپ العان. تىركەۋ دەرەكتەرىنە سايكەس، كومپانيا قىزمەتىنىڭ تۇرلەرى قاتارىندا «ەتتى وڭدەۋ جانە كونسەرۆىلەۋ»، سونداي-اق تەحنيكالىق سىناقتار مەن تالداۋلار جۇرگىزۋ كورسەتىلگەن.
بۇل جاعداي جانۋارلاردى قورعاۋشىلار مەن قالا تۇرعىندارىنىڭ الاڭداۋشىلىعىن تۋعىزدى.
قوعام نازارىن اۋدارعان تاعى ءبىر جايت — كومپانيا قۇرىلتايشىسى اسىلجان حايرەتدينوۆتىڭ قازاقستان اۋىل شارۋاشىلىعى مينيسترلىگى ۆەتەريناريالىق باقىلاۋ كوميتەتىنە قاراستى رەسپۋبليكالىق ەپيزووتياعا قارسى جاساق فيليالىن باسقارۋى بولدى.
ورال اكىمدىگىنىڭ تۇسىندىرۋىنشە، مەملەكەتتىك ساتىپ الۋ باعا ۇسىنىستارىن سۇراتۋ ءتاسىلى ارقىلى وتكىزىلگەن. بايقاۋدا ءبىر جانۋاردى اۋلاۋ قىزمەتىن 5 مىڭ تەڭگەگە ۇسىنعان كومپانيا جەڭىمپاز اتانعان. سونىمەن قاتار كونكۋرس تالاپتارىندا قاڭعىباس جانۋارلارمەن جۇمىس ىستەۋ تاجىريبەسىنىڭ بولۋى مىندەتتى شارت رەتىندە قاراستىرىلماعان.
قالا بيلىگىنىڭ مالىمەتىنشە، ورالدا قاڭعىباس يتتەر ماسەلەسى ءالى دە وزەكتى كۇيىندە قالىپ وتىر. تەك وتكەن جىلدىڭ وزىندە جانۋارلاردىڭ شابۋىلىنان ءۇش مىڭعا جۋىق ادام زارداپ شەككەن.
اكىمدىك وكىلدەرى مەردىگەر جانۋارلارعا جاۋاپكەرشىلىكپەن قاراۋ تۋرالى زاڭ تالاپتارىن ساقتاۋعا مىندەتتى ەكەنىن مالىمدەدى. سونداي-اق جانۋارلاردى اۋلاۋ مەن قاجەت بولعان جاعدايدا ەۆتانازيا جاساۋ گۋماندىق ادىستەرمەن جانە تاپسىرىس بەرۋشىنىڭ باقىلاۋىمەن جۇرگىزىلۋى ءتيىس ەكەنىن اتاپ ءوتتى.
وسى جاعداي اياسىندا قازاقستاندا جانۋارلارعا قاتىستى زاڭنامانى قاتاڭداتۋ ماسەلەسى توڭىرەگىندەگى پىكىرتالاستار جالعاسۋدا. بۇعان دەيىن ەل سەناتى جانۋارلاردى ۇستالعاننان كەيىن بەس كۇن ىشىندە مىندەتتى تۇردە ۇيىقتاتۋدى قاراستىراتىن تۇزەتۋلەردى قابىلداماي، زاڭ جوباسىن قايتا قاراۋعا جىبەرگەن بولاتىن.
