پرەزيدەنت قاسىم-جومارت توقاەۆ تۇركى ەلدەرىنىڭ جاساندى ينتەللەكت ورتالىقتارىنىڭ جەلىسىن قۇرۋدى ۇسىندى. ول ءبىلىم-عىلىم سالاسىنا قاجەتتى ماماندار دايارلايتىن وقۋ ورتالىقتارى مەن عىلىمي مەكەمەلەر كەرەك ەكەنىن ايتتى، دەپ حابارلايدى "ادىرنا".
بۇل تۋرالى مەملەكەت باسشىسى تۇركى مەملەكەتتەرى ۇيىمىنىڭ بەيرەسمي سامميتىندە ايتتى.
پرەزيدەنتتىڭ سوزىنشە، ءوزارا تاجىريبە الماسۋ، بىرلەسىپ كادرلار دايارلاۋ جانە وزىق تەحنولوگيالاردى ەنگىزۋ وتە ماڭىزدى. سوندىقتان ول تۇركى ەلدەرىنىڭ جاساندى ينتەللەكت ورتالىقتارىنىڭ جەلىسىن قۇرۋدى ۇسىندى.
ء"بىز قازاقستاندا جاڭا فورماتتاعى تەحنولوگيالىق وقۋ ورنى – جاساندى ينتەللەكت ۋنيۆەرسيتەتىن اشۋدى جوسپارلاپ وتىرمىز. جوعارى وقۋ ورنىندا تۇركى مەملەكەتتەرىنىڭ ازاماتتارىن وقىتۋ ءۇشىن ارنايى گرانتتار بولۋگە دايىنبىز. باعدارلامالاۋ، جاساندى ينتەللەكت جانە وزىق تسيفرلىق تەحنولوگيا سالالارى بويىنشا تۇركى ەلدەرىنىڭ جاستارى اراسىندا جىل سايىن عىلىمي-تەحنولوگيالىق وليمپيادا ۇيىمداستىرعان ءجون دەپ سانايمىز. بۇل باستامالاردى جۇزەگە اسىرۋ ءۇشىن تۇركى ينۆەستيتسيالىق قورى تاراپىنان قارجىلاي كومەك كورسەتۋگە بولار ەدى", - دەدى ول.
توقاەۆتىڭ سوزىنشە، بيىل قور ناقتى جوبالار بويىنشا جۇمىس ىستەۋ تاسىلىنە كوشتى. جارعىلىق كاپيتالى 600 ميلليون دوللارعا جەتتى. ونى ۇلعايتۋعا بولادى.
"بۇل – ايرىقشا ءمانى بار ستراتەگيالىق رەسۋرس. سول سەبەپتى قور بارلىق ستارتاپقا قولداۋ كورسەتىپ، ينفراقۇرىلىمدىق جوبالاردى ىسكە اسىرۋعا بەلسەنە اتسالىسادى دەپ سەنەمىز. قور تولىققاندى قىزمەت كورسەتۋگە ءتيىس. مۇشە مەملەكەتتەردى وسى مىندەتتى جەدەل جۇزەگە اسىرۋعا شاقىرامىن", - دەدى ول.
