Мәжіліс «Қазақстан Республикасының мемлекеттік наградалары туралы» заңға түзетулерді қабылдады, деп хабарлайды «Адырна» тілшісі.
Заң аясында «AL-FARABI», «QOJA AHMET YASAUI» және «Мейірім» ордендерін тағайындау, сондай-ақ ордендермен және медальдармен марапаттау тәртібін өзгерту жөніндегі нормалар қарастырылған.
«Мейірім» ордені меценаттық және филантропиялық қызметі, сондай-ақ қайырымдылық саласына қосқан елеулі үлесі үшін табысталады. «QOJA AHMET YASAUI» танымал қазақстандық және шетелдік ғалымдарға, мемлекет және қоғам қайраткерлеріне берілсе, «AL-FARABI» ордені білім мен ғылым, мәдениет және рухани өмір салаларында жетістікке жеткен азаматтарға арналған.
Заң жобасы енді Сенаттың қарауына жіберілді.
Наурыз айында президент Қасым-Жомарт Тоқаев жақын уақытта «QOJA AHMET YASAUI» орденін мемлекеттік наградалар тізіміне енгізу туралы жарлыққа қол қоятынын мәлімдеген болатын. Ал сәуірде мемлекет басшысы «AL-FARABI» орденін тағайындауды да ұсынған.
Айта кетейік, ордендер алғаш рет биыл Республика күні қарсаңында табысталмақ.
