رەسەي بيلىگى ارمەنيا تاراپىنان ۋكراينا پرەزيدەنتى ۆلاديمير زەلەنسكيدىڭ ەرەۆاندا جاساعان مالىمدەمەلەرىنە بايلانىستى رەسمي تۇسىنىكتەمە كۇتەتىنىن ايتتى. بۇل تۋرالى رەسەي پرەزيدەنتىنىڭ ءباسپاسوز حاتشىسى دميتري پەسكوۆ مالىمدەدى، دەپ حابارلايدى “ادىرنا”.
«ينتەرفاكس» اگەنتتىگىنىڭ حابارلاۋىنشا، پەسكوۆ ەرەۆاندا وتكەن «ارمەنيا – ەۋرووداق» ءسامميتىن وتكىزۋدى «قالىپتى جاعداي» دەپ باعالاعان. ونىڭ ايتۋىنشا، ارمەنيا سىرتقى ساياساتتا كوپۆەكتورلى باعىتتى ۇستانادى جانە مۇنداي سامميتتەر وتكىزۋ – ەلدىڭ ەگەمەن قۇقىعى.
«بىراق ەرەۆاندا رەسەيگە قارسى مالىمدەمەلەر جاساۋعا مۇمكىندىك بەرىلگەنى قالىپتى ەمەس. بۇل ءبىزدىڭ ەرەۆانمەن قارىم-قاتىناسىمىزدىڭ رۋحىنا سايكەس كەلمەيدى»، — دەدى پەسكوۆ.
ونىڭ سوزىنشە، رەسەي تاراپى ۋكراينا پرەزيدەنتىنىڭ ەرەۆاندا جاساعان «انتيرەسەيلىك مالىمدەمەلەرىنە» بايلانىستى ارمەنيادان تۇسىنىكتەمە كۇتەدى.
«ارينە، ءبىز ەرەۆان تاراپىنان قانداي دا ءبىر تۇسىنىكتەمە بولادى دەپ كۇتەمىز»، — دەدى رەسەي پرەزيدەنتىنىڭ وكىلى.
سونداي-اق ول ماسكەۋدىڭ «نەلىكتەن ارمەنيادان رەسەيگە قارسى مالىمدەمەلەر ايتىلىپ جاتقانىن» جانە «نەگە ارمەنيا پرەمەر-ءمينيسترى مۇنى ءوز سوزدەرىمەن تەڭەستىرۋگە تىرىسپاي وتىرعانىن» تۇسىنبەيتىنىن ايتتى.
ء«بىز ءۇشىن ەڭ باستىسى – ارمەنيانىڭ رەسەيگە قارسى ۇستانىمدا بولماۋى»، — دەپ قوستى پەسكوۆ.
ارمەنيادا 4–5 مامىر كۇندەرى ەۋروپالىق ساياسي قاۋىمداستىق ءسامميتى جانە «ارمەنيا – ەۋرووداق» ءسامميتى وتكەن بولاتىن.
سامميت بارىسىندا ۋكراينا پرەزيدەنتى ۆلاديمير زەلەنسكي 9 مامىردا ماسكەۋدە وتەتىن پاراد تۋرالى ايتىپ، «ۋكراين دروندارى دا بۇل پارادتىڭ ۇستىنەن ۇشىپ ءوتۋى مۇمكىن» دەپ مالىمدەگەن ەدى.
