فوتو: kremlin.ru
ماسكەۋدەگى قىزىل الاڭدا ەكىنشى دۇنيەجۇزىلىك سوعىسىنداعى جەڭىستىڭ 81 جىلدىعىنا ارنالعان اسكەري پاراد ءوتتى. بيىلعى ءىس-شارا شامامەن 45 مينۋتقا عانا سوزىلدى، دەپ حابارلايدى "ادىرنا" پورتالى "ازاتتىق راديوسىنا" سىلتەپ.
بۇل جولى پاراد العاش رەت كوپ جىلدان بەرى اسكەري تەحنيكانىڭ قاتىسۋىنسىز ءوتتى. كرەمل بۇل شەشىمدى «جەدەل جاعدايعا» بايلانىستى دەپ ءتۇسىندىردى. دەگەنمەن، اۋە تەحنيكاسىنىڭ كورسەتىلىمى ساقتالدى.
رەسەي قورعانىس مينيسترلىگىنىڭ مالىمەتىنشە، جاياۋ كولوننا قۇرامىندا بارلىق تۇردەگى جوعارى اسكەري وقۋ ورىندارىنىڭ كۋرسانتتارى، سونداي-اق ۋكرايناداعى سوعىسقا قاتىسقان اسكەري قىزمەتشىلەر بولعان. تەلەترانسلياتسيا بارىسىندا ديكتور شاراعا سولتۇستىك كورەيا اسكەري قىزمەتشىلەرىنىڭ دە قاتىسقانىن حابارلادى.
رەسەي پرەزيدەنتى ۆلاديمير پۋتين سالتاناتتى ءسوز سويلەپ، ۇلى وتان سوعىسىندا قازا تاپقانداردى ەسكە الىپ، ءبىر مينۋت ۇنسىزدىك جاريالادى.
پارادقا بەلارۋس، قازاقستان، وزبەكستان، مالايزيا جانە لاوس ەلدەرىنىڭ باسشىلارى قاتىستى. سونداي-اق رەسەي مويىنداعان، بىراق حالىقارالىق قاۋىمداستىق مويىندامايتىن وڭتۇستىك وسەتيا مەن ابحازيا باسشىلارى دا كەلگەن. ال سلوۆاكيا پرەمەر-ءمينيسترى روبەرت فيتسو ماسكەۋگە كەلگەنىمەن، پارادقا قاتىسپاعان.
Der Spiegel باسىلىمى رەسەي بيلىگى قىزىل الاڭداعى پارادقا قاتىسۋى ءتيىس شەتەلدىك جۋرناليستەردىڭ اككرەديتاتسياسىن قايتارىپ العانىن حابارلاعان. كرەملدىڭ ءباسپاسوز حاتشىسى دميتري پەسكوۆ بۇل اقپاراتتى جوققا شىعارىپ، «Der Spiegel دۇرىس ەمەس مالىمەت تاراتتى» دەدى. دەگەنمەن، ول جۋرناليستەر سانىنىڭ شەكتەلگەنىن راستادى.
بيىل جەڭىستىڭ 81 جىلدىعى اتالىپ وتۋدە. وتكەن جىلى، مەرەيتويلىق پارادقا 10 مىڭنان استام اسكەري قىزمەتشى، سونىڭ ىشىندە ۋكرايناداعى سوعىسقا قاتىسقاندار دا بولعان ەدى.
رەسەي 8–9 مامىر كۇندەرىنە بىرجاقتى تۇردە ۋاقىتشا ءبىتىم جاريالاعان ەدى. الايدا ماسكەۋ بۇل ءبىتىم بۇزىلعان جاعدايدا كيەۆ ورتالىعىنا سوققى بەرۋ مۇمكىن ەكەنىن ەسكەرتكەن. ۋكراينا پرەزيدەنتى ۆلاديمير زەلەنسكي 6 مامىردان باستاپ اتىستى توقتاتۋدى ۇسىنعانىمەن، رەسەي بۇعان كەلىسپەي، شابۋىلداردى جالعاستىرعان.
8 مامىر تۇنىندە رەسەي وڭىرلەرى دە اۋقىمدى شابۋىلدارعا ۇشىراعانى حابارلاندى.
اقش پرەزيدەنتى دونالد ترامپ رەسەي مەن ۋكراينا اراسىندا ءۇش كۇندىك ءبىتىم تۋرالى كەلىسىم جاسالعانىن مالىمدەدى. كەيىن كيەۆ پەن ماسكەۋ بۇل كەلىسىمدى راستاعان. سونىمەن قاتار تاراپتار 1000-عا 1000 فورمۋلاسى بويىنشا اۋقىمدى اسكەري تۇتقىندار الماسۋىن جۇزەگە اسىرۋعا ۋاعدالاسقان. ترامپ بۇل قادامدى «ۇزاققا سوزىلعان، قاندى ءارى اۋىر سوعىستىڭ اياقتالۋىنىڭ باستاماسى بولۋى مۇمكىن» دەپ باعالاپ، رەسەي پرەزيدەنتى ۆلاديمير پۋتين مەن ۋكراينا پرەزيدەنتى ۆلاديمير زەلەنسكيگە باستامانى قولداعانى ءۇشىن العىس ءبىلدىردى. زەلەنسكي ءۇش كۇندىك ءبىتىمدى جانە تۇتقىن الماسۋ كەلىسىمىن راستادى. ونىڭ ايتۋىنشا، ۋكراينا ءۇشىن باستى گۋمانيتارلىق ماسەلە – اسكەري تۇتقىنداردى ەلگە قايتارۋ. «قىزىل الاڭ ءبىز ءۇشىن تۇتقىنعا تۇسكەن ۋكراين ازاماتتارىنىڭ ومىرىنەن ماڭىزدى ەمەس»، – دەگەن ۋكراينا پرەزيدەنتى 9 مامىردا ماسكەۋ قالاسىندا پاراد وتكىزۋگە «رۇقسات بەرەتىن» جارلىققا قول قويعانى باق-تا ءبىراز داۋ تۋدىرعانى بەلگىلى.
