قازاقستان رەسپۋبليكاسىنىڭ پرەمەر-ءمينيسترى ولجاس بەكتەنوۆ رەيحستاگقا تۋ تىككەن حالىق قاھارمانى راقىمجان قوشقارباەۆتىڭ ەسكەرتكىشىنە گۇل شوقتارىن قويدى. بۇل تۋرالى ۇكىمەتتىڭ ءباسپاسوز قىزمەتى جاريالادى، دەپ حابارلايدى “ادىرنا” ۇلتتىق پورتالى.
شاراعا جينالعاندار سوعىس جىلدارىندا قازا تاپقان جاۋىنگەرلەر مەن بەيبىت ومىرگە ورالىپ، بۇگىندە مارقۇم بولعان بارشا ارداگەردى ءبىر مينۋت ۇنسىزدىكپەن ەسكە الدى.
"ادامزات تاريحىنداعى ەڭ سۇراپىل سوعىستا قازاقستاندىقتار دا تەڭدەسسىز ەرلىك پەن ەرەن ەڭبەكتىڭ داڭقتى ۇلگىسىن كورسەتتى. ۇلى جەڭىس قاھارماندارىنىڭ ارقاسىندا بۇگىنگى ۇرپاق بەيبىت ەلدە ءومىر ءسۇرىپ، كەمەل بولاشاققا نىق سەنىممەن قادام باسىپ وتىر", - دەدى بەكتەنوۆ ءوز سوزىندە.
ول ۇلى جەڭىس قاھارماندارىنىڭ ەسىمى ەشقاشان ۇمىتىلمايتىنىن ايتتى.
"ايبىندى باتىرلارىمىز باۋىرجان مومىشۇلى، ساعادات نۇرماعامبەتوۆ، راقىمجان قوشقارباەۆ، ءاليا مولداعۇلوۆا، مانشۇك مامەتوۆا، حيۋاز دوسپانوۆا، مالىك عابدۋللين، تالعات بيگەلدينوۆ سىندى باسقا دا كوپتەگەن وتانداستارىمىزدىڭ مايدان دالاسىنداعى ەرلىكتەرىنە ماڭگى تاعزىم ەتەمىز. حالقىمىز تۋعان جەرىمىزدى قورعاپ قالعان سوعىس ارداگەرلەرى مەن تىل ەڭبەككەرلەرىنىڭ ەسىمدەرىن ءاردايىم ۇلىقتاي بەرمەك", — دەدى بەكتەنوۆ.
