اقش پرەزيدەنتى دونالد ترامپ پارسى شىعاناعىندا تۇرىپ قالعان كەمەلەردى قۇتقارۋ وپەراتسياسى تەگەرانمەن بەيبىت كەلىسىمگە كەلۋ مۇمكىندىگىن باعالاۋ ءۇشىن «قىسقا ۋاقىتقا» توقتاتىلاتىنىن مالىمدەدى، دەپ حابارلايدى "ادىرنا" ءتىلشىسى.
ونىڭ ايتۋىنشا، دۇيسەنبى كۇنى باستالعان «ازاتتىق جوباسى» كەلىسسوزدەردە دەلدال بولىپ وتىرعان پاكىستاننىڭ جانە وزگە دە ەلدەردىڭ وتىنىشىمەن ۋاقىتشا توقتاتىلادى.
ترامپ Truth Social جەلىسىندە بۇل شەشىم ء«ىرى اسكەري جەتىستىكتەر» مەن يرانمەن بەيبىت كەلىسىمگە قول جەتكىزۋ جولىنداعى «ايتارلىقتاي ىلگەرىلەۋگە» بايلانىستى قابىلدانعانىن جازدى.
«بلوكادا ساقتالىپ تۇرعان كەزدە، „ازاتتىق جوباسى“ كەلىسىمدى اياقتاپ، قول قويۋ مۇمكىندىگىن انىقتاۋ ءۇشىن قىسقا مەرزىمگە توقتاتىلادى»، — دەپ قوستى ول.
يراننىڭ مەملەكەتتىك باق-تارى بۇل وپەراتسيانىڭ توقتاتىلۋى ترامپتىڭ الەمدىك تەڭىز قاتىناسى ءۇشىن اسا ماڭىزدى سۋ جولىن اشۋ ارەكەتتەرىندەگى بىرقاتار ساتسىزدىكتەردەن كەيىن «شەگىنگەنىن» بىلدىرەدى دەپ مالىمدەدى.
بۇعان دەيىن ترامپ 4 مامىردان باستاپ اقش تاياۋ شىعىستاعى داعدارىسقا قاتىسى جوق «بەيتاراپ» ەلدەردىڭ كەمەلەرىنە ورمۇز بۇعازى ارقىلى وتۋگە كومەكتەسەتىنىن حابارلاعان ەدى. ەلدىڭ مەملەكەتتىك حاتشىسى ماركو رۋبيو اق ۇيدەگى بريفينگتە بۇل وپەراتسيا يران ورمۇز بۇعازىن جاپقاننان كەيىن پارسى شىعاناعى ايماعىندا قالىپ قويعان شامامەن 87 ەلدىڭ 23 مىڭعا جۋىق بەيبىت تۇرعىنىن ەۆاكۋاتسيالاۋ ءۇشىن باستالعانىن ايتقان.
