بەلگىلى ساياساتكەر جانە دارىگەر باقىت تۇمەنوۆا دۇنيەدەن وزدى. قارالى حاباردى ءماجىلىس دەپۋتاتى ەرمۇرات باپي جەتكىزدى، دەپ حابارلايدى «ادىرنا» ءتىلشىسى.
«بەۋ، دۇنيە! باقۇل بول، باقىت اپا!ەلىمىزدىڭ دەنساۋلىقتى ساقتاۋ سالاسى، وپپوزيتسيالىق قاۋىمداستىق ۇلكەن جوعالتۋعا ۇشىرادى. 78 جاسقا قاراعان شاعىندا بەلگىلى دارىگەر، دەنساۋلىق ساقتاۋ ءىسىنىڭ ۇيىمداستىرۋشىسى، «امان-ساۋلىق» قوعامدىق قورىنىڭ پرەزيدەنتى تۇمەنوۆا باقىت نيازبەكقىزى دۇنيەدەن ءوتتى»،-دەپ جازدى ول.
باقىت تۇمەنوۆا 1948 جىلى قىزىلوردا قالاسىندا دۇنيەگە كەلگەن. ورتا مەكتەپتى بىتىرگەن سوڭ 1966 جىلى سەمەي مەملەكەتتىك مەديتسينا ينستيتۋتىنا وقۋعا ءتۇسىپ، ونى 1972 جىلى پەدياتريا ماماندىعى بويىنشا بىتىرگەن. ەڭبەك جولىن وسى قالاداعى بالالاردىڭ جۇقپالى اۋرۋلار اۋرۋحاناسىندا دارىگەر بولىپ باستاپ، ءبولىم مەڭگەرۋشىسى، باس دارىگەر بولىپ 15 جىلعا جۋىق جەمىستى ەڭبەك ەتكەن. 1986-1994 جىلدارى وبلىستىق دەنساۋلىقتى ساقتاۋ باسقارماسى باسشىسىنىڭ انالىق پەن بالالىقتى قورعاۋ ماسەلەلەرى بويىنشا ورىنباسارى، ءبىرىنشى ورىنباسارى قىزمەتىندە بولعان. 1994-1998 جىلدارى وبلىس اكىمى اپپاراتىندا سەمەي پوليگونىنداعى يادرولىق سىناق زارداپتارىن جويۋ جونىندەگى ءبولىمنىڭ مەڭگەرۋشىسى، ىشكى ساياسات جانە الەۋمەتتىك سالا ءبولىمىنىڭ مەڭگەرۋشىسى قىزمەتىن اتقارعان. 1998-2001 جىلدارى پاۆلودار وبلىسى اكىمىنىڭ الەۋمەتتىك ماسەلەلەر جونىندەگى ورىنباسارى لاۋازىمىندا بولعان.
باقىت نيازبەكقىزى بۇكىل ءومىرىن الەۋمەتتىك سالا جۇمىسىنا ارناعان. 2000 جىلداردىڭ باسىندا بەلسەندى ازاماتتىق ۇستانىمى ونى ساياساتقا الىپ كەلدى. ول – «قازاقستاننىڭ دەموكراتيالىق تاڭداۋى» رەسپۋبليكالىق قوعامدىق بىرلەستىگى جانە «العا!» حالىق پارتياسىنىڭ باستاۋىندا تۇرعان جانداردىڭ ءبىرى.
