قازاقستاندا گرۋزيانىڭ تانىمال ساياساتكەرى، ادجاريا اۆتونوميالىق رەسپۋبليكاسىنىڭ بۇرىنعى ۇكىمەت باسشىسى جانە «ءبىرتۇتاس ۇلتتىق قوزعالىس» پارتياسىنىڭ مۇشەسى لەۆان ۆارشالوميدزە ۇستالدى، دەپ حابارلايدى "ادىرنا" ۇلتتىق پورتالى IPN اگەنتتىگىنە سىلتەپ.
باسىلىمنىڭ مالىمەتىنشە، ۆارشالوميدزە قازاقستان شەكاراسىنان اۋەجاي ارقىلى وتكەن كەزدە قولعا تۇسكەن. الدىن الا اقپارات بويىنشا، ونىڭ ۇستالۋىنا رەسەي فەدەراتسياسىنان جىبەرىلگەن سۇرانىس سەبەپ بولعان. بۇل سۇرانىس ساياساتكەردىڭ ۋكراينا بيلىگىمەن ساياسي كەڭەسشىلىك قىزمەتىنە بايلانىستى قىلمىستىق ىسكە قاتىستى.
گرۋزيانىڭ «ءبىرتۇتاس ۇلتتىق قوزعالىسى» پارتياسىنىڭ جەتەكشىلەرىنىڭ ءبىرى لەۆان بەجاشۆيلي رەسەي تاراپىنان قوزعالعان ءىستىڭ نەگىزسىز ەكەنىن مالىمدەدى.
— قازىر لەۆان ۆارشالوميدزەنىڭ ەكستراديتسيالانۋ قاۋپى بار. سوندىقتان ءبىز قازاقستان جانە ۋكراينا ۇكىمەتتەرىمەن بايلانىس ورناتىپ، شىنايى اقپارات بەرۋگە كۇش سالىپ جاتىرمىز. بۇل قىلمىستىق ءىس ساياسي استارمەن قوزعالعانى تۇسىنىكتى. سوندىقتان دۇرىس شەشىم قابىلداۋ ءۇشىن ناقتى كوممۋنيكاتسيا قاجەت، — دەدى بەجاشۆيلي.
قازتاگ اگەنتتىگى ۆارشالوميدزەنىڭ ءىسى اتىراۋ وبلىستىق پوليتسيا دەپارتامەنتىنە بەرىلگەنىن انىقتادى. جۋرناليستەر دەپارتامەنتتىڭ ءباسپاسوز قىزمەتىنەن رەسمي تۇسىنىكتەمە كۇتىپ وتىر.
لەۆان ۆارشالوميدزە – ميحايل سااكاشۆيليدىڭ جاقىن سەرىگى، 2004-2012 جىلدارى ادجاريا ۇكىمەتىن باسقارعان جانە ايماقتا اۋقىمدى رەفورمالار جۇرگىزىپ، ونى زاماناۋي تۋريستىك ورتالىققا اينالدىرعان. ول 2003 جىلعى «راۋشان توڭكەرىسىندە» ماڭىزدى ءرول اتقارىپ، اسلان اباشيدزەنىڭ رەجيمىن بيلىكتەن شەتتەتۋگە ىقپال ەتكەن.
2014 جىلدان باستاپ ۆارشالوميدزە ۋكراينا بيلىگىنە كەڭەسشىلىك جاساپ، باسقارۋ جانە ينفراقۇرىلىمدىق رەفورمالارعا اتسالىسقان. ول ميحايل سااكاشۆيلي ودەسسا وبلىسىنىڭ گۋبەرناتورى بولعان كەزدە بىرگە جۇمىس ىستەپ، سىبايلاس جەمقورلىققا قارسى جانە اكىمشىلىك رەفورمالاردى دامىتۋعا كومەكتەستى.
ايتا كەتەيىك، 2014 جىلى رەسەي بيلىگى ۆارشالوميدزەگە قارسى قىلمىستىق ءىس قوزعاپ، ونى گرۋزيا مەن رەسەي اراسىنداعى 2008 جىلعى قاقتىعىسقا بايلانىستى سىرتتاي قاماۋعا الۋ تۋرالى شەشىم شىعارعان. ساراپشىلار بۇل ايىپتاۋلاردىڭ ساياسي استارى بار دەپ ەسەپتەيدى.
