Memleket basşysy Qasym-Jomart Toqaev Kreativtı industriiany damytu qorynyŋ keŋsesın aralap kördı. Būl turaly Aqordanyŋ baspasöz qyzmetı jazdy, dep habarlaidy «Adyrna» tılşısı.
Qasym-Jomart Toqaev qor jūmysymen tanysty. Būl memleket basşysynyŋ tapsyrmasyna sai otandyq kreativtı sektordy qoldaudyŋ negızgı instituty retınde qūrylǧan.
Prezidentke jaŋa keŋıstıktıŋ şyǧarmaşyl jastar, investorlar men turister bas qosatyn orynǧa ainalatyny jönınde baiandaldy.
Şourum formatynda bezendırılgen keŋsede kreativtı önım äzırleudıŋ tolyq siklı körsetılgen. Sol arqyly köpşılık qarapaiym ideiany öndırıske ainaldyruǧa deiıngı şyǧarmaşylyq ürdıstıŋ qalai jürgızıletının tamaşalai alady.
Memleket basşysy zergerlık jäne aǧaş şeberhanalaryn, muzyka, kılem toqu, beineleu önerı zaldaryn, fashion-aimaqty aralady.
Yurt Capsule – mūndaǧy negızgı orynnyŋ bırı. Būl keŋıstıkte kiız üidıŋ dästürlı formasy tehnologiialyq tūrǧydan jaŋa keiıpke engen. Joba sifrlyq önerdı, multimediialyq kontenttı jäne mädeni storitellingtı bır arnaǧa toǧystyrady.
Qasym-Jomart Toqaevqa elımızdıŋ brendın qalyptastyru tūjyrymdamasy jaiynda mälımet berıldı. Bastama mädeni mūralarymyzdy zamanǧa sai jaŋaşa interpretasiialau, kreativtı industriiany damytu jäne ūlttyq bıregeilıktı nyǧaitu arqyly elımızdıŋ turistık äleuetın arttyrudy közdeidı.
Kreativtı industriiany damytu qory talantty jastardy ızdep tauyp, olarǧa qoldau körsetu, investisiia tartu, infraqūrylymdy jetıldıru sekıldı tört negızgı baǧyt boiynşa jūmys ısteidı. Otandyq kreativtı önımderdı syrtqy naryqqa şyǧaruǧa yqpal etedı. Sonymen qatar barlyq oblys ortalyǧynda aşylǧan öŋırlık habtardyŋ qyzmetın üilestıredı.
Bügınde Qazaqstannyŋ kreativtı ekonomika salasynda şamamen 48 myŋ käsıpkerlık nysan bar. Olar 160 myŋǧa juyq adamdy jūmyspen qamtyp otyr. İndustriiaǧa kino, animasiia, geimdevelopment, sifrlyq öner, sän, dizain jäne halyqtyq qolöner sekıldı salalar zor üles qosuda.
