فوتو: Reuters
رەسەي پرەزيدەنتى ۆلاديمير پۋتين فەدەرالدىق قاۋىپسىزدىك قىزمەتى اكادەمياسىنا فەليكس دزەرجينسكيدىڭ قۇرمەتتى اتىن بەرۋ تۋرالى جارلىققا قول قويدى. قۇجات قول قويىلعان كۇننەن باستاپ كۇشىنە ەندى، دەپ حابارلايدى “ادىرنا”.
«رەسەي فەدەراتسياسىنىڭ فەدەرالدىق مەملەكەتتىك قازىنالىق جوعارى ءبىلىم بەرۋ مەكەمەسى «فەدەرالدىق قاۋىپسىزدىك قىزمەتىنىڭ اكادەمياسىنا» قۇرمەتتى دزەرجينسكي اتى بەرىلسىن”، — دەپ جازىلعان جارلىق ماتىنىندە.
بۇل شەشىم اكادەميانىڭ قىزمەتكەرلەرىنىڭ جەتىستىكتەرى مەن فەليكس دزەرجينسكيدىڭ مەملەكەتتىك قاۋىپسىزدىك سالاسىنداعى ماڭىزدى ۇلەسى ەسكەرىلە وتىرىپ قابىلدانعان دەلىنەدى.
سونداي-اق، اتالعان شەشىم كەڭەس وداعى داستۇرىنە ورالۋ بولىپ سانالادى، سەبەبى وقۋ ورنى 1962 جىلدان 1992 جىلعا دەيىن فەليكس دزەرجينسكيدىڭ اتىن يەلەنىپ، كسرو مەملەكەتتىك قاۋىپسىزدىك كوميتەتىنىڭ جوعارى مەكتەبى دەپ اتالعان. كەڭەس وداعىنىڭ ىدىراۋىنان كەيىن بۇل اتاۋ جويىلعان.
ايتا كەتەيىك، فەليكس دزەرجينسكي (1877–1926) — رەۆوليۋتسيونەر، 1917 جىلى بولشەۆيكتەر ساياسي قارسىلاستارىمەن كۇرەسۋ ءۇشىن قۇرعان بۇكىلرەسەيلىك توتەنشە كوميسسياسى قاۋىپسىزدىك ورگانىن باسقارعان تۇلعا. تاريحشىلار ونى رەسەيدەگى ازامات سوعىسى (1917—1922) كەزىندە بولشەۆيكتەردىڭ جۇرگىزگەن «قىزىل تەررور» جازالاۋ شارالارىنىڭ باستى ارحيتەكتورلارىنىڭ ءبىرى دەپ سانايدى.
