سەرىكجان ءبىلاش بۇكىل قازاقتىڭ قابىرعاسىن قايىستىرعان قايعىلى وقيعاعا قاتىستى كورگەنسىزدىك تانىتىپ، حالىقتىڭ اشۋىن كەلتىردى. الەۋمەتتىك جەلىدە جاريالاعان بەينەجازباسىندا ول جەر قويناۋىنا بۇگىن عانا تابىستالعان قازاقتىڭ كورنەكتى اقىنى، جازۋشى، دراماتۋرگ، قوعام قايراتكەرى مۇحتار شاحانوۆتى قورلايتىن ادەپسىز پىكىر بىلدىرگەن.
«قايتىس بولسا، نە بولىپتى، دۇنيە قۇلاپ قالىپتى ما، جەر شارى توقتاپ قالىپ پا، كۇن باتىستان شىعىپ پا، نە بولىپ قالىپتى سونشاما؟! ءبىر ارسىز اقىن ءولدى. قولىنا قالام ۇستاپ، قاعاز كەمىرىپ، بىرنەشە شۋماق ولەڭ جازعان، قولدان جاسالعان تۇلعا»، – دەپ ءتىل تيگىزدى جازۋشىعا سەرىكجان ءبىلاش.
اقش-تا جۇرگەن «اتاجۇرت» ۇيىمىنىڭ جەتەكشىسى «ەندى نە ايتامىن، كوردىم دە قۇرىسىن، وتە ارسىز، ۇياتسىز، ەكى بەتتەي جالاقور ادام دۇنيەدەن وزدى، بولدى، باسقا ايتارىم جوق»، – دەپ قازاقتىڭ ءبىرتۋار اقىنىنا كىر كەلتىرگەن.
حالىقتىڭ ىزاسىنا تيگەن سەرىكجان ءبىلاشتىڭ ۆيدەوسى الەۋمەتتىك جەلىلەردە تالقىلانىپ، پايدالانۋشىلار تاراپىنان سىنعا الىندى. جەلى قولدانۋشىلارى «نە دەگەن سۇمدىق»، ء«بىلاشتىڭ بۇل تىرلىگى ادامدىققا دا، ارعا دا سىن»، «ۇيات-اي، ماسقارا»، «سەرىكجان سويلەي-سويلەي بادىككە اينالدى»، «سەكەڭدى سەكەڭدەتىپ جىبەرۋ كەرەك»، «وسى نەمەنىڭ ينتەرنەتىن ءوشىرىپ تاستايتىن جاقسى ادام بار ما»جانە باسقا دا پىكىر قالدىرعان.
الەۋمەتتىك جەلى پايدالانۋشىلارىنىڭ پىكىرىنشە، سەرىكجان ءبىلاش مارقۇم بولعان كورنەكتى اقىننىڭ تىرناعىنا دا تاتىمايدى، سوندىقتان ەكەۋىن سالىستىرۋدىڭ دا قاجەتى جوق. ارانداتۋشىنىڭ ارەكەتىنە اشۋلانعان حالىق مۇحتار شاحانوۆتىڭ قايسار مىنەزىمەن ءور رۋحى، ەلدىك مۇددە الدىنداعى ادالدىعى ەشقاشان ۇمىتىلمايتىنىن اتاپ ءوتىپ، سەرىكجان بىلاشقا ەل شەكاراسىن اتتاپ باسپاۋعا كەڭەس بەردى.
جۋرناليست-بلوگەر ابزال يبراشەۆ تە داۋلى پىكىرگە پىكىر ءبىلدىرىپ، ءبىلاشتىڭ پىكىرى ورىنسىز ەكەنىن جەتكىزدى.
«مۇحتار شاحانوۆتى سىنايتىنداي سەن كىم ەدىڭ؟ ونىڭ جاساعانىنىڭ 1 پايىزىن دا ىستەمەدىڭ. مىنبەردە قازاقتىڭ ءتىلى، جاستارى ءۇشىن سويلەدىڭ بە؟»- دەدى بەلسەندى.
ەستەرىڭىزگە سالا كەتەيىك، 19 ءساۋىر كۇنى 84 جاسقا قاراعان شاعىندا اقىن، دراماتۋرگ، قوعام قايراتكەرى، قازاقستاننىڭ حالىق جازۋشىسى، ەڭبەك ەرى مۇحتار شاحانوۆتىڭ دۇنيەدەن ءوتتى. شوقتىعى بيىك تۇلعا تۇركىستان وبلىسىنىڭ وتىرار اۋدانىندا 22 ءساۋىر كۇنى جەرلەندى.
