ورتالىق سايلاۋ كوميسسياسىنىڭ توراعاسى نۇرلان ءابدىروۆ بۇگىن، 21 تامىزدا ۆەدومستۆودا وتكەن بريفينگتە دەپۋتاتتاردىڭ توسبەلگىسى قالاي وزگەرەتىنىن ايتتى، دەپ حابارلايدى «ادىرنا» ءتىلشىسى.
وسك توراعاسىنىڭ ايتۋىنشا، بۇل ماسەلە مەملەكەت باسشىسىنىڭ قاتىسۋىمەن دە تالقىلانعان. پرەزيدەنت توسبەلگىنىڭ كولەمىن كىشىرەيتۋدى، سونداي-اق ونى دايىنداۋ كەزىندە قىمبات مەتالداردى پايدالانۋدان باس تارتۋدى ۇسىنعان.
«بۇل ماسەلەنى كوميسسيا وتىرىستارىندا بىرنەشە رەت تالقىلادىق. ونىڭ ۇستىنە ۇلتتىق بانك مونەتا سارايىنىڭ ماماندارىن تارتىپ، ەگجەي-تەگجەيلى قاراستىردىق. ولار توسبەلگىنى جەزدەن جاساۋدى ۇسىندى»، – دەدى توراعا.
بۇعان دەيىن دەپۋتاتتاردىڭ توسبەلگىلەرى 375 سىنامالى التىننان جاسالعان ەدى. ءابدىروۆتىڭ ايتۋىنشا، ولار سوڭعى رەت 2023 جىلى ساتىپ الىنعان. سول كەزدە ءبىر توسبەلگىنىڭ باعاسى 313 600 تەڭگە بولعان.
جەزدەن جاسالعان جاڭا توسبەلگى الدەقايدا ارزانعا تۇسەدى. ونىڭ باعاسى شامامەن 42 000 تەڭگەنى قۇرايدى. بۇل رەتتە بۇرىنعى دەپۋتاتتار وكىلەتتىك مەرزىمى اياقتالعاننان كەيىن وزدەرىنىڭ توسبەلگىلەرىن قايتارمايدى.
