مەملەكەت باسشىسى قاسىم-جومارت توقاەۆ «تۇراقتى بولاشاق – ورتاق كوزقاراس» وڭىرلىك ەكولوگيالىق سامميتىندە ءسوز سويلەدى. بۇل تۋرالى بۇگىن، 22 ساۋىردە اقوردانىڭ ءباسپاسوز قىزمەتى جازدى، دەپ حابارلايدى «ادىرنا» ءتىلشىسى.
پرەزيدەنت بەتالىسى بەيمالىم اۋمالى-توكپەلى كەزەڭدە جۇزدەسىپ وتىرعاندارىن اتاپ ءوتتى.
«مۇنىڭ زاردابى وڭىرلىك جانە جاھاندىق تۇراقتىلىققا، ميلليونداعان ادامنىڭ تۇرمىس ساپاسىنا قانشالىقتى اۋىر ءتيىپ جاتقانىن ەگجەي-تەگجەيلى ايتۋدىڭ قاجەتى جوق. سونىڭ سالدارىنان دامۋ جولىنداعى كۇش-جىگەر، كۇرمەۋى قيىن ەكولوگيالىق پروبلەمالارعا جۇمسالۋعا ءتيىس رەسۋرستار زايا كەتىپ جاتىر»،-دەدى ول.
قاسىم-جومارت توقاەۆ بۇل رەتتە حالىقارالىق قوعامداستىق ەرەكشە ءرول اتقاراتىنىن مالىمدەدى.
«سەكسەن جىل بۇرىن قۇرىلعان بىرىككەن ۇلتتار ۇيىمى ءالى كۇنگە بالاماسى جوق، امبەباپ ديالوگ الاڭى ەكەنى ءسوزسىز. الايدا ودان بەرى الەم تۇبەگەيلى وزگەرىسكە ۇشىرادى. جاساندى ينتەللەكت بۇكىل ادامزات ساناسىن جاۋلاپ، كۇندەلىكتى ومىرگە دەندەپ ەندى.
حالىقارالىق قۇقىقتىڭ نەگىزى سانالاتىن بۇۇ جارعىسىنىڭ بۇلجىماس بەرىكتىگى تۋرالى ءجيى ايتىلادى. ايتسە دە، ول –قالاۋىڭا قاراي تاپسىرىسپەن الدىراتىن جەڭسىك اس ەمەس.
كەرىسىنشە، بۇۇ جارعىسىن ءبىرتۇتاس، جان-جاقتى قۇجات رەتىندە قابىلداۋ كەرەك. ونىڭ ەرەجەلەرى ءدال سول قالپىندا تانىلىپ، مۇلتىكسىز ساقتالۋعا ءتيىس.
سول سەبەپتى بۇۇ جانە باسقا دا ءىرى حالىقارالىق ۇيىمدار اۋقىمى مەن سيپاتى جاعىنان بۇرىن-سوڭدى بولماعان ءارى بولجاۋى قيىن وزگەرىستەر داۋىرىنە قادام باسقان قازىرگى الەمنىڭ اقيقاتىن قاپەرگە العانى ءجون»،-دەدى پرەزيدەنت.
مەملەكەت باسشىسى بۇۇ-نىڭ الەمدەگى قاقتىعىستارعا اسەرى تۋرالى دا ايتتى.
ء«بىز بۇۇ جارعىسىنداعى قاعيداتتاردى حالىقارالىق قارۋلى قاقتىعىستارعا قاتىستى ءوز ىڭعايىمىزعا قاراي قولدانۋدان اۋلاق بولۋىمىز قاجەت. سونىمەن قاتار كوپجاقتى ينستيتۋتتارعا دەگەن سەنىمگە سەلكەۋ تۇسپەۋى كەرەك. دەگەنمەن ماڭىزدى حالىقارالىق ماسەلەلەردى شەشۋگە ولاردىڭ ابىروي-بەدەلى جەتپەي جاتقانى وكىنىشتى»،-دەپ تولىقتىردى ول.
