قازاقستاندا HiPP ماركالى بالالار تاعامىنان «ەگەۋقۇيرىق ۋى تابىلدى» دەگەن اقپارات جوققا شىعارىلدى، دەپ حابارلايدى "ادىرنا" ۇلتتىق پورتالى.
بۇل تۋرالى دەنساۋلىق ساقتاۋ مينيسترلىگىنە قاراستى سانيتاريالىق-ەپيدەميولوگيالىق باقىلاۋ كوميتەتى مالىمدەدى.
ۆەدومستۆو مالىمەتىنشە، اتالعان دەرەك حالىقارالىق باقىلاۋ جۇيەلەرىندە دە تىركەلمەگەن. اتاپ ايتقاندا، RASFF جانە INFOSAN جەلىلەرى ارقىلى دا مۇنداي اقپارات تۇسپەگەن.
سونىمەن قاتار كوميتەت وكىلدەرى بۇل ءونىمنىڭ ەۋرازيالىق ەكونوميكالىق وداقتىڭ مەملەكەتتىك تىركەۋ كۋالىكتەرىنىڭ بىرىڭعاي تىزىلىمىندە جوق ەكەنىن اتاپ ءوتتى. وسىعان بايلانىستى مۇنداي ءونىمدى قازاقستان اۋماعىندا ساتۋعا رەسمي تۇردە رۇقسات بەرىلمەيدى.
«بۇل ءونىم ەل اۋماعىندا رەسمي تۇردە ساتىلىمدا بولماۋى ءتيىس. سوعان قاراماستان، ىقتيمال زاڭبۇزۋشىلىقتاردى بولدىرماۋ ءۇشىن تەكسەرۋ جۇمىستارى جالعاسىپ جاتىر»، – دەلىنگەن حابارلامادا.
