22 جاستاعى قازاقستان ازاماتى ەرنۇر الماحان دۋبايدا ءومىر بويىنا سوتتالىپ كەتتى، دەپ حاباپلايدى "ادىرنا".
ەرنۇر 2024 جىلى بىرىككەن اراب امىرلىكتەرىنە جۇمىس ىستەۋگە كەتكەن. ءۇي ىشىمەن ۇنەمى حابارلاسىپ وتىرعان ول سوڭعى قوڭىراۋلاردىڭ بىرىندە وزىنە جالا جابىلعانىن ايتقان. ال قازاقستاننىڭ سىرتقى ىستەر مينيسترلىگىنىڭ 14 ساۋىردە بەرگەن اقپاراتىندا ونىڭ ءومىر بويىنا سوتتالعانى ايتىلادى. ال قانداي باپپەن ءىستى بولعانى بەلگىسىز.
ەرنۇر الماحاننىڭ اناسى نۇرگۇل الماحانوۆا ءباسپاسوز ءماسليحاتىندا بالاسىنا جالا جابىلعانىن ايتىپ، ۇلىنىڭ ومىرباقيعا سوتتالىپ كەتەردەي قىلمىس جاساعانىنا سەنبەيتىنىن جەتكىزدى. اناسىنىڭ ايتۋىنشا، ۇلى 2024 جىلدىڭ قىركۇيەگىندە دۋبايعا جۇمىس ىستەيمىن دەپ كەتكەن. جات ەلگە بارعان ساتىنەن باستاپ اناسىمەن ەكى-ءۇش كۇن سايىن بايلانىسقا شىعىپ تۇرعان ەكەن.
"مەنىڭ بالام 2024 جىلى قىركۇيەكتىڭ ورتاسىندا دۋبايعا "جۇمىس ىستەيمىن" دەپ كەتكەن. ناقتى قانداي جۇمىس ەكەنىن ايتپادى، "بىلمەيمىن، بارعان سوڭ ءوزىمنىڭ باستىعىم تاۋىپ بەرەدى" دەدى. كەتكەننەن كەيىن اراسىندا حابارلاسىپ تۇردى. قاي جەردە ءجۇردى، قايدا باردى، كىممەن سويلەستى، سونى ايتىپ تۇراتىن. دۋبايدا تاكسي ايدادى. 2024 جىلى 31 جەلتوقساندا جاڭا جىلمەن قۇتتىقتادى، سودان كەيىن حابارسىز كەتتى. ال مەن قايدا حابارلاساتىنىمدى بىلمەدىم. ال جاقىندا ء"ومىر باقي باس بوستاندىعىنان ايىرىلدى" دەگەن قاعاز كەلدى. بالام وسىلاي سوتتالاتىنداي ءىس-ارەكەتكە بارادى دەپ ويلامايمىن. وتە اقكوڭىل ءارى جۋاس بالا. مەنىڭ بالام جازىقسىز سوتتالىپ كەتتى مە دەپ الاڭدايمىن. سول ءۇشىن پرەزيدەنتتەن كومەك سۇرايمىن. ەگەر بالام كىنالى بولسا، وسى جەردە سوتتالسىن", – دەپ جىلادى نۇرگۇل الماحانوۆا كومەك سۇراپ.
اراعا ءبىراز ۋاقىت سالىپ، بالادان حابار بولماعان سوڭ اتا-اناسى ءوز بەتىنشە كونسۋلدىق پەن سىرتقى ىستەر مينيستىرلىگىنە حات جازىپ، سۇراۋ سالا باستايدى. سودان 14 cاۋىردە مينيستىرلىكتىڭ اتا-اناسىنا بەرگەن رەسمي حاتىندا ەرنۇر الماحانعا قاتىستى 18 ناۋرىزدا بىرىككەن اراب امىرلىكتەرىنىڭ ءبىرىنشى ساتىداعى سوتىندا ومىرباقيعا سوتتالدى دەگەن ۇكىم شىققانى ايتىلعان. وعان قوسا الماحانعا 2 540 000 ديرحام، ياعني، 300 ملن تەڭگە ايىپپۇل سالىنعانى تۋرالى اقپاراتتى ەستىپ اتا-اناسى ابدىراپ قالعان.
ەرنۇر شەتەلگە كەتپەي تۇرىپ الماتىدا كافەلەردىڭ بىرىندە بارمەن بولىپ جۇمىس ىستەگەن. اناسىنىڭ ايتۋىنشا، باستىق دەپ وتىرعانى – سول كافەنىڭ باستىعى. اناسى سول باستىعىنىڭ دا قايدا ەكەنىن بىلمەيدى.
2026 جىلعى ناۋرىزدا بىرىككەن اراب امىرلىكتەرى سوتىنىڭ ءبىرىنشى ينستانتسياسى ەرنۇر الماحاندى ءومىر بويىنا باس بوستاندىعىنان ايىرعان. قازىر ءىس بويىنشا اپەللياتسيالىق شاعىم بەرىلىپ، سوت پروتسەسى جالعاسىپ جاتىر.
"ارادا ۋاقىت ءوتىپ، ەش حابار بولماعان سوڭ بالانىڭ اكەسى سىرتقى ىستەر مينيسترلىگى، ەلشىلىككە حات جازا باستاعان. ءالى كۇنگە دەيىن اناسى بالاسى ەرنۇردىڭ نە ءۇشىن سوتتالعانىن بىلمەيدى. قولىمىزدا سىرتقى ىستەر مينيسترلىگىنىڭ بۇعان دەيىن تۋىستارى جازعان شاعىمعا بەرگەن جاۋابى بار. بالانىڭ جاقىندارى تەك وسى جاۋاپتان عانا بالالارىنىڭ سوتتالعانىن بىلگەن. ءبىزدىڭ سىرتقى ىستەر مينيسترلىگى بالانىڭ بيىل 18 ناۋرىز كۇنى بىرىككەن اراب امىرلىكتەرىندە ءومىر بويىنا سوتتالعانىن جانە 2 ميلليون 540 ديرحام (ياعني 300 ملن تەڭگەگە جۋىق) ايىپپۇل سالىنعانىن جازعان. حاتتا 27 ءساۋىر كۇنى وپپەلياتسيا بولاتىنى ايتىلعان. دەگەنمەن سىرتقى ىستەر مينيسترلىگى ازاماتتىڭ قانداي باپپەن، نە ءۇشىن سوتتالعانىن، نە ءۇشىن سونشا ايپپۇل سالىنعانى، جالپى بالانىڭ نە ىستەپ قويعانىن انىقتاماعان، ولار بىلمەيدى. سوندىقتان ءبىز وسى جيىندا قازاقستاننىڭ سىرتقى ىستەر مينيسترلىگىنىڭ وسى ءىستى ناقتى انىقتاپ، ارالاسۋىن سۇرايمىز", – دەيدى قورعاۋشى ينگا يمانباي.
وسى ءىستى قولعا الىپ وتىرعان زاڭگەر ينگا يمانبايدىڭ ايتۋىنشا، ەرنۇر الماحان قازاقستاننىڭ ازاماتى، قولىندا ەلىمىزدىڭ تولقۇجاتى بولا تۇرا نە مينيستىرلىك، نە سول جاقتاعى ءوز مەملەكەتى مەن ونىڭ ازاماتتارىنىڭ زاڭدى مۇددەلەرىن قورعاۋ ىستەرىمەن اينالىساتىن كونسۋلدىق الماحان ءبىر جىلدان استام تەرگەۋ يزولياتورىندا جاتقاندا، ودان سوڭ نەگىزگى سوت وتىرىستارىندا ەش حابار الماعانى ما دەگەن زاڭدىق سۇراق تۋىندايدى.
«سىرتقى ىستەر مينيستىرلىگى تاراپىنان شۇعىل جانە ناقتى ارەكەت قابىلداپ، ازاماتىمىزدىڭ قۇقىقتارى حالىقارالىق دەڭگەيدە تولىق قورعالعانىن قالايمىز. سونىمەن قاتار، ءىستىڭ ءادىل جانە جان-جاقتى تەرگەلۋىن قامتاماسىز ەتىپ، جازانى وتەۋ نەمەسە ەكستراديتسيالاۋ ماسەلەسىن قاراستىرىپ بەرسە ەكەن دەگەن تالابىمىز بار. بۇگىن دە ءبىز الماحاننىڭ ناقتى قانداي ءىس بويىنشا ومىرباقيعا كەتكەنىنىن ەش حابارىمىز جوق. مينيستىرلىك وسىعان قاتىستى نوتا جولدانعانىن جازىپتى، ال اپەللياتسيالىق سوت 27 ساۋىرگە جوسپارلانعان ەكەن»،– دەيدى زاڭگەر ينگا يمانباي.
