فوتو: nf group
قازاقستان باس پروكۋراتۋراسىنىڭ اكتيۆتەردى قايتارۋ قىزمەتى دۋبايداعى 97 پاتەردىڭ قازاقستان ازاماتتارىنا تيەسىلى بولۋى مۇمكىن دەگەن اقپاراتقا قاتىستى ازىرگە تەكسەرىس جۇرگىزۋگە نەگىز جوق ەكەنىن مالىمدەدى. بۇل تۋرالى ۆەدومستۆو BES.media باسىلىمىنىڭ رەسمي ساۋالىنا جاۋاپ بەردى، دەپ حابارلايدى “ادىرنا”.
ماسەلە بۇعان دەيىن جۋرناليست ماناس قايىرتايۇلى جاريالاعان اقپاراتتان كەيىن قوعامدا تالقىلانا باستادى. ونىڭ ايتۋىنشا، دۋبايداعى Fairmont The Palm قوناقۇيىنىڭ ماڭىندا ورنالاسقان تۇرعىن ءۇي كەشەنىندە شامامەن 97 پاتەر قازاقستان ازاماتتارىنىڭ اتىنا تىركەلگەن بولۋى مۇمكىن. بولجام بويىنشا، پاتەر يەلەرىنىڭ قاتارىندا سۋديالار، بۇرىنعى مينيسترلەر، سونداي-اق مەملەكەتتىك قىزمەتكەرلەردىڭ جۇبايلارى مەن بالالارى بولۋى ىقتيمال.
وسىعان بايلانىستى BES.media ءتىلشىسى قازاقستان باس پروكۋراتۋراسىنىڭ اكتيۆتەردى قايتارۋ قىزمەتىنە رەسمي ساۋال جولداپ، بۇل دەرەكتەر بويىنشا تەكسەرىس جۇرگىزىلە مە دەگەن سۇراق قويعان. ۆەدومستۆو وكىلدەرى قولدانىستاعى زاڭناماعا سايكەس شەتەلدە جىلجىمايتىن مۇلىككە يە بولۋ زاڭ بۇزۋشىلىق بولىپ سانالمايتىنىن اتاپ ءوتتى.
«ۋاكىلەتتى ورگاندار تاراپىنان رەسمي تەكسەرۋلەر جۇرگىزىلمەيىنشە، شەتەلدەگى جىلجىمايتىن مۇلىكتى ىقتيمال ساتىپ الۋ نەمەسە يەلەنۋ تۋرالى جاريالانعان اقپاراتقا قۇقىقتىق باعا بەرۋ مۇمكىن ەمەس»، – دەپ حابارلادى باس پروكۋراتۋرا.
ۆەدومستۆو سونداي-اق مەملەكەتكە زاڭسىز شىعارىلعان اكتيۆتەردى قايتارۋ جۇمىستارى جالعاسىپ جاتقانىن حابارلادى. سوڭعى ەكى جارىم جىل ىشىندە پروكۋراتۋرا مەملەكەتكە جالپى سوماسى 1,3 ترلن تەڭگەدەن استام اكتيۆتى قايتارعان. ونىڭ ىشىندە ناقتى قايتارىلعان قاراجات پەن مۇلىكتىڭ كولەمى 1,076 ترلن تەڭگەنى قۇرايدى. بۇل سومانىڭ 968,5 ملرد تەڭگەسى اقشالاي تۇردە قايتارىلسا، 107,7 ملرد تەڭگەسى مۇلىك تۇرىندە، سونىڭ ىشىندە شەتەلدەگى اكتيۆتەر رەتىندە مەملەكەت مەنشىگىنە وتكەن.
ايتا كەتەيىك، دۋبايداعى پالما دجۋمەيرا اۋدانىندا ورنالاسقان Fairmont The Palm قوناقۇيى ماڭىندا جۋىردا تاعى ءبىر وقيعا تىركەلگەن. رەسمي اقپاراتقا سايكەس، 28 اقپاندا قوناقۇي اۋماعىنا يراندىق «شاحەد» ۇشقىشسىز اپپاراتى قۇلاعان. وقيعا سالدارىنان ءتورت ادام جاراقات الىپ، مەديتسينالىق مەكەمەلەرگە جەتكىزىلگەن.
