الماتىداعى ءال-فارابي اتىنداعى قازاق ۇلتتىق ۋنيۆەرسيتەتى ستۋدەنتتەرىنە قاتىستى جەكە مالىمەتتەردىڭ تارالۋ فاكتىسى تىركەلدى، دەپ حابارلايدى “ادىرنا” ۇلتتىق پورتالى.
اشىق قولجەتىمدىلىككە ستۋدەنتتەردىڭ اتى-ءجونى، فاكۋلتەتتەرى، ءتارتىپ بۇزۋشىلىقتارى جانە مەديتسينالىق انىقتامالارى شىققان.
تاراتىلعان قۇجاتتار ۋنيۆەرسيتەتتىڭ وقۋ چاتتارى مەن الەۋمەتتىك جەلىلەردە جاريالانعان. اقپاراتتى كىم جانە قانداي ماقساتتا تاراتقانى ازىرگە بەلگىسىز.
ستۋدەنتتەردىڭ ايتۋىنشا، بۇل جاعداي ولاردىڭ الاڭداۋشىلىعىن تۋدىرىپ وتىر. ولار مۇنداي مالىمەتتەردىڭ ۋنيۆەرسيتەت ىشىندە عانا ساقتالۋى ءتيىس ەكەنىن ايتادى.
ۋنيۆەرسيتەت اكىمشىلىگى وقيعا تۋرالى الەۋمەتتىك جەلىلەر ارقىلى بىلگەنىن مالىمدەدى. رەكتورات وكىلدەرى جابىق اقپاراتتىڭ چاتتارعا قالاي تاراعانى تۋرالى اقپارات تاراتپادى. ولاردىڭ ايتۋىنشا، مۇنداي دەرەكتەر ىشكى مونيتورينگ ءۇشىن جينالادى، تەك شەكتەۋلى تۇلعالارعا عانا قولجەتىمدى بولۋى ءتيىس.
وقۋ ورنىنىڭ ءبىرىنشى پرورەكتورى ەركىن دۇيسەنوۆتىڭ سوزىنشە، ستۋدەنتتەرگە قاتىستى اقپارات سيتۋاتسيالىق باسقارۋ قىزمەتى ارقىلى تاۋلىك بويى باقىلاۋدا بولادى. بۇل مالىمەتتەر جەدەل ارەكەت ەتۋ ءۇشىن پايدالانىلاتىن جابىق اقپارات ساناتىنا جاتادى.
اكىمشىلىك دەرەگىنشە، ستۋدەنتتەردىڭ جەكە مالىمەتتەرىنە مەديتسينالىق قىزمەتكەرلەر دە قول جەتكىزە الادى. قازىرگى تاڭدا وقيعا بويىنشا الماتى قالاسىنىڭ پروكۋراتۋراسى تەكسەرىس باستاعان. قاداعالاۋ ورگانى دەرەكتەردىڭ تارالۋىنا جاۋاپتى تۇلعالاردىڭ ارەكەتىنە قۇقىقتىق باعا بەرىلەتىنىن حابارلادى.
ايتا كەتەيىك، بۇل قازۇۋ-دا تىركەلگەن العاشقى جاعداي ەمەس. بۇعان دەيىن دە ستۋدەنتتەردىڭ مەديتسينالىق قۇپيالارى الەۋمەتتىك جەلىلەرگە تاراپ، قوعامدا رەزونانس تۋدىرعان بولاتىن
