قاراعاندى اۋماعىندا ورنالاسقان جوساباي ۋچاسكەسىندە جۇرگىزىلگەن گەولوگيالىق بارلاۋ ناتيجەلەرى بويىنشا التىن قورى ايتارلىقتاي ارتتى، دەپ حابارلايدى "ادىرنا" ۇلتتىق پورتالى.
تاۋ-كەن سامۇرىق كومپانياسىنىڭ مالىمەتىنشە، الىناتىن التىن قورىنىڭ جالپى كولەمى 8 182,2 كيلوگرامعا جەتكەن. بۇعان دەيىن مەملەكەتتىك بالانسقا 4 862,2 كيلوگرامم عانا تىركەلگەن بولاتىن. وسىلايشا، قور كولەمى 68 پايىزعا ۇلعايدى.
مامانداردىڭ ايتۋىنشا، بارلاۋ جۇمىستارى اياسىندا 7 340 مەتر بۇرعىلاۋ جۇرگىزىلىپ، كەن ورنىنىڭ جاڭارتىلعان 3D-مودەلى جاسالعان. سونىمەن قاتار قورلار ساناتتارى قايتا قارالىپ، ءبىر بولىگى «بولجامدى» ساناتتان «انىقتالعان» ساناتقا اۋىستىرىلعان. ناتيجەسىندە كورسەتكىشتەردە ايتارلىقتاي وزگەرىس تىركەلدى: انىقتالعان قورلار 1 338 كيلوگرامعا ارتسا، بولجامدى قورلار 481,5 كيلوگرامنان 1 676,8 كيلوگرامعا دەيىن ءوستى. سونداي-اق 786,7 كيلوگرامم التىن «ولشەنگەن» ساناتقا ەنگىزىلدى.
جوسپارعا سايكەس، 2026 جىلى قوسىمشا 8 590 مەتر بۇرعىلاۋ جۇمىستارى جۇرگىزىلەدى. ال 2027 جىلدىڭ سوڭىنا قاراي جاڭارتىلعان قورلار مەملەكەتتىك بالانسقا رەسمي تۇردە ەنگىزىلۋى ءتيىس.
ساراپشىلار بۇل ناتيجەلەر قازاقستانداعى گەولوگيالىق بارلاۋ جۇمىستارىن كۇشەيتۋ جانە پايدالى قازبالار قورىن ناقتىلاۋ باعىتىنداعى مەملەكەتتىك ساياساتپەن سايكەس كەلەتىنىن اتاپ وتەدى.
