قازاقستاندا بىرىڭعاي جيناقتاۋشى زەينەتاقى قورى (بجزق) سالىمشىلارىنىڭ ءبىرى شوتىنداعى قاراجاتتىڭ ازايىپ كەتكەنىنە بايلانىستى قورعا شاعىمداندى، دەپ حابارلايدى "ادىرنا" ۇلتتىق پورتالى ينفورمبيۋروعا سىلتەپ.
ونىڭ ايتۋىنشا، زەينەتاقى جيناقتارىنىڭ ءبىر بولىگىن وتباسى بانك دەپوزيتىنە اۋدارماق بولعان. الايدا شوتتاعى سومانىڭ ازايعانىن بايقاعان.
بجزق وكىلدەرى بۇل جاعدايدى ينۆەستيتسيالىق تابىستىڭ تۇراقسىزدىعىمەن ءتۇسىندىردى. قور مالىمەتىنشە، سالىمشىلاردىڭ زەينەتاقى جارنالارى ءتۇرلى قارجى قۇرالدارىنا ينۆەستيتسيالانادى، ال ودان تۇسەتىن تابىس تۇراقتى بولمايدى جانە نارىقتىق جاعدايلارعا تاۋەلدى.
«ينۆەستيتسيالىق قىزمەت ناتيجەسىندە ەسەپتەلەتىن تابىس كولەمى ءار كەزەڭدە وزگەرىپ وتىرادى. 2026 جىلعى ناۋرىزدا تەڭگەنىڭ دوللارعا قاتىستى نىعايۋى جانە شەتەلدىك باسقارۋداعى اكتيۆتەردىڭ نارىقتىق قۇنىنىڭ تومەندەۋى ينۆەستيتسيالىق تابىستىڭ ازايۋىنا اسەر ەتتى. سونىڭ سالدارىنان سالىمشىلار شوتىندا تەرىس ينۆەستيتسيالىق تابىس ەسەپتەلدى»، – دەپ حابارلادى قور.
سونداي-اق بجزق وكىلدەرى ينۆەستيتسيالىق شىعىندار كەزىندە سالىمشىلاردىڭ جيناق كولەمى ۋاقىتشا ازايۋى مۇمكىن ەكەنىن اتاپ ءوتتى. بۇل ءوز كەزەگىندە مەرزىمىنەن بۇرىن الۋعا بولاتىن قاراجات مولشەرىنە دە اسەر ەتەدى.
