Şymkentte köşe tazalauǧa jauapty kommunaldyq mekemenıŋ kölık jürgızuşılerı jappai jūmysqa şyqpai qoidy, dep habarlaidy «Adyrna» tılşısı KTK-ǧa sılteme jasap.
Būl şeşımge mekeme direktorynyŋ jūmysşylardy kündız-tünı jūmys ıstetkenımen, qosymşa ailyq bermeitını sebep bolǧan. Qyzmetkerler kölıkterdıŋ de mai-suyn öz qaltasynan auystyryp, qosymşa bölşekterdı de öz qarjylaryna alatynyn jetkızdı. Osyǧan kelıspegen 100-den astam jūmysşyny «Eŋbekşı» dep atalatyn komunaldyq memlekettık mekemenıŋ direktory bügın, auyzşa, jappai jūmystan quǧan.
«Jūmys uaqyty 9-dan 6-ǧa deiın dep bekıtılgen. Bıraq bır künderı saǧat 9-da, 10-da, 11-de, keide tüngı 2-de de qaitqanmyn. Taŋǧy 4-ke deiın ıstegender bar, senbıde ketkenımızge jūmystan şyǧaryp jatyr. Aqy tölenbeidı, jeksenbı künı de jūmysqa şyǧartady. «Şyqpaimyn» deseŋ boldy, «bossyŋ» deidı. Būl kısınıŋ jūmysy — jūmystan şyǧaru»,-deidı jürgızuşılerdıŋ bırı.
Byltyr qaraşada qūrylyp, jūmys ıstep jatqan kommunaldyq mekemenıŋ direktory qol astyndaǧylardyŋ şaǧymynyŋ bıreuımen de kelıspeitının aitty.
«Öz qaltamyzdan alamyz degenı ötırık. Eşkım alyŋdar mäjbürlep jatqan joq. Alty kündık jūmys künıne ötıp jatyrmyz. Būl jerde bölım basşysy dūrys jetkızbegen dep oilaimyn»,-dedı Nūrjan Tölebekov.
Şulaǧan jūmysşylar qala basşysyn şaqyrǧan. Qala äkımınıŋ ornyna audan äkımınıŋ orynbasary kelgen. Bıraq jauapty şeneunıktıŋ jūmysşylarmen äŋgımesı jaraspady. Jūmysqa şyqpadyŋdar degen bappen jūmystan bosatamyz degen soŋ jürgızuşılerdıŋ bırazy kölıkke qaita otyruyna tura keldı. Bıraq 180 jürgızuşı mäselege qala äkımı aralasyp, jügensız basşynyŋ äreketıne prokurorlar men eŋbek inspeksiiasy aralasqanyn qalaidy.
